ముఖ్యమంత్రి వైఎస్ జగన్మోహన్ రెడ్డికి రిటర్న్ గిఫ్ట్ ఇవ్వడం ఎవరికీ సాధ్యం కాదని వైఎస్సార్ కాంగ్రెస్ పార్టీ ఎంపీ నందిగం సురేష్ అన్నారు. వైసీపీ నుంచి సస్పెన్షన్‌కు గురైన ఎమ్మెల్యే ఉండవల్లి శ్రీదేవి మాట్లాడే ముందు జాగ్రత్తగా మాట్లాడితే మంచిదని హితవుపలికారు. స్కాములు, స్కీములు, టిడ్కో ఇళ్లు అంటూ శ్రీదేవి ఏదేదో మాట్లాడతున్నారని.. ఇలాంటి విషయాలపై ఉండవల్లి శ్రీదేవి కాస్త వెనకా, ముందూ చూసుకుని మాట్లాడాలని సూచించారు.
వైసీపీ ప్రభుత్వంపై, ముఖ్యమంత్రి జగన్మోహన్ రెడ్డి విమర్శలు చేసే ముందు శ్రీదేవి అన్ని ఆలోచించుకోవాలని ఎంపీ నందిగం సురేష్ అన్నారు. ఎమ్మెల్యే శ్రీదేవి క్రాస్ ఓటింగ్‌కు పాల్పడ్డట్లు తమ వద్ద అన్ని ఆధారాలు ఉన్నాయని తెలిపారు. పార్టీ స్టాండ్ దాటారు కాబట్టే ఆమెపై వేటు పడిందని తేల్చిచెప్పారు.
ఇక, తమ నుంచి ఎమ్మెల్యే ఉండవల్లి శ్రీదేవికి ఎలాంటి ఆపద ఉండదని ఎంపీ నందిగం సురేష్ అన్నారు. దళితులను సర్వనాశనం చేసిన వ్యక్తి చంద్రబాబునాయుడు అని ఆరోపించారు. ఎప్పుడన్నా చంద్రబాబునాయుడు దళితులను గౌరవించారా అని ప్రశ్నించారు. చంద్రబాబు రాసిచ్చిన స్క్రిప్ట్ ప్రకారమే ఎమ్మెల్యే ఉండవల్లి శ్రీదేవి మాట్లాడారని పేర్కొన్నారు. గతంలో శ్రీదేవిని మేకప్, పేకప్ అంటూ టీడీపీ నేతలు విమర్శించిన విషయం ఆమె గుర్తించుకోవాలని సూచించారు.
టీడీపీకి ఓటేసి.. అమరావతి, రాజధాని అంటూ ఎమ్మెల్యే ఉండవల్లి శ్రీదేవి ఏవేవో మాటలు మాట్లాడుతున్నారని నందిగం సురేష్ అన్నారు. శ్రీదేవికి ఏపీలో పూర్తి రక్షణ ఉందని.. ఆమెకు టీడీపీ నుంచే ప్రమాదం పొంచి ఉందని వ్యాఖ్యానించారు. ఎమ్మెల్యే శ్రీదేవిపై టీడీపీ నాయకులే దాడి చేసి.. దాన్ని వైసీపీ వాళ్లే చేశారని చెప్తారన్నారు. తప్పు ఎవరు చేసినా తప్పేనని, తప్పు చేసిన వారిని జగన్ ఉపేక్షించరని తేల్చిచెప్పారు. చంద్రబాబు తరహాలో తప్పులు చేసిన వాళ్లను జగన్ వెంటపెట్టుకుని తిరగరని, ఇసుక బకాసురులను జగన్ ప్రొత్సహించరని చెప్పుకొచ్చారు.
