‘చంద్రముఖి 2’ సినిమా హిట్ అయితే ‘చంద్రముఖి 3’ మళ్లీ రజనీకాంత్ తో చేస్తానని దర్శకుడు పి.వాసు చెప్పాడు. ఆల్రెడీ చంద్రముఖి 2 థియేటర్లలోకి వచ్చేసింది. దీనిపై వచ్చిన టాక్ తో సూపర్ స్టార్ గ్రీన్ సిగ్నల్ ఇస్తాడా.. చంద్రముఖి 3లో నటించేదెవరు..
ఓ హారర్ కామెడీ సినిమా సౌత్ ఇండియా ఇండస్ట్రీ హిట్ గా నిలవడం చంద్రముఖితోనే మొదలని చెప్పాలి. అప్పటి వరకూ మాస్ క్యారెక్టర్స్ పోషించిన రజనీకాంత్ తొలిసారిగా హీరో ఇమేజ్ కి భిన్నమైన రోల్ లో కనిపించడం కొత్తగా ఫీలయ్యారు ప్రేక్షకులు. అందుకే 20 ఏళ్ల క్రితం విడుదలై ఇండస్ట్రీ హిట్ గా నిలిచిన చంద్రముఖి సినిమాకు విశేష ఆదరణ వచ్చింది. దానికి సీక్వెల్ గా తెరకెక్కింది చంద్రముఖి 2. ఫస్ట్ పార్ట్ లో రజనీకాంత్-జ్యోతిక-నయనతార నటించగా..సెకెండ్ పార్ట్ లో లారెన్స్-కంగనా నటించారు. భారీ అంచనాల మధ్య విడుదలైన చంద్రముఖి 2 మూవీలో చాలా సీన్స్ ఫస్ట్ పార్ట్ లో చూసినట్టే ఉన్నాయంటున్నారు ప్రేక్షకులు. హీరో ఇంట్రడక్షన్ ఫైట్, మహల్‌కు వచ్చేటప్పుడు పాట, అవమానాలు, ప్యాలెస్ పక్కన ఉండే పేద వాడి ఇంట్లో ఉండే అమ్మాయిని హీరో ఇష్టపడటం, ఆ అమ్మాయి ప్యాలెస్‌లో తిరుగుతూ దెయ్యం పట్టినట్లు నటించడం ఇవన్నీ రెండు పార్టుల్లో సేమ్ టు సేమ్. కేవలం ఇంటర్వల్ బ్యాంగ్, క్లైమాక్స్ ని కొంత మార్చారు. చంద్రముఖి సినిమాతో కంపేర్ చేసుకోకుండా సినిమాకు వెళితే ఎంజాయ్ చేయొచ్చు కానీ చంద్రముఖి సినిమాతో కంపేర్ చేసుకుంటే మాత్రం నిరాశ తప్పదు. ఇప్పుడీ సినిమా స్టోరీ, నటీనటుల గురించి పక్కనపెడితే… పార్ట్ 3 మళ్లీ రజనీకాంత్ తో తీస్తానన్నాడు దర్శకుడు పి.వాసు. ఇప్పుడది వర్కౌట్ అవుతుందా అన్నదే టాపిక్
చంద్రముఖి 3 లో రజనీకాంత్
చంద్రముఖి బ్లాక్ బస్టర్ హిట్టుగా నిలిచింది..చంద్రముఖి 2 మాత్రం ఓవరాల్ టాక్ అయితే పర్వాలేదంటున్నారు కానీ సూపర్ హిట్ అని మాత్రం చెప్పడం లేదు. పైగా లాంగ్ గ్యాప్ తర్వాత జైలర్ తో సూపర్ హిట్టందుకున్నాడు రజనీకాంత్. వరుస ప్రాజెక్టులతో బిజీ అవుతున్నాడు. ఇలాంటి టైమ్ లో చంద్రముఖి 3కి గ్రీన్ సిగ్నల్ ఇస్తాడా అన్నది హాట్ టాపిక్. ఇప్పుడున్న పరిస్థితిలో ఎంపిక చేసుకునే ప్రతి ప్రాజెక్ట్ తప్పనిసరిగా హిట్టిచ్చేలా ఉండాలి…లేదంటే మళ్లీ ఫ్యాన్స్ డీలా పడిపోతారు. రెండో భాగంలోనే ఎలాంటి కొత్తదనం చూపించని దర్శకుడు థర్డ్ పార్ట్ ని ఆసక్తికరంగా మలుస్తాడని కచ్చితంగా చెప్పలేం. అందుకే రజనీకాంత్ ఇలాంటి సాహసం చేస్తారా? పి.వాసుకి మళ్లీ డేట్స్ కేటాయిస్తారా? అన్నది హాట్ టాపిక్. ప్రస్తుతానికి కాంచన సిరీస్ లో నటిస్తోన్న లారెన్స్..ఇకపై చంద్రముఖి సిరీస్ ని కూడా కంటిన్యూ చేస్తాడా అనే చర్చ కూడా జరుగుతోంది. ఏదేమైనా చంద్రముఖి 3 సినిమాపై త్వరలోనే క్లారిటీ వచ్చే అవకాశం ఉంది.
