టాలీవుడ్ లో పాన్ ఇండియా స్టార్ అనగానే ఠక్కున ప్రభాస్ పేరు చెబుతారు. బాహుబలికి ముందు ఆ తర్వాత తెలుగు ఇండస్ట్రీ రేంజ్ మారిపోయింది. అందులో బాహుబలిగా నటించిన యంగ్ రెబల్ స్టార్ రేంజ్ అంతకుమించి అన్నట్టుంది. ఆ క్రేజ్ ని రోజురోజుకీ మరింత పెంచుకుంటూ వెళ్లిపోతున్నాడు ప్రభాస్. ఇప్పుడు ఏకంగా సౌత్ లో ఇప్పటివరకూ ఏ హీరో సాధించని రికార్డ్ నార్త్ లో క్రియేట్ చేశాడు.
పాన్ ఇండియా స్టార్ అంటే దేశవ్యాప్తంగా ప్రేక్షకుల్ని అలరించాలి. తన సినిమాలతో ఎంటర్ టైన్ చేయాలి. ఆ జాబితాలో ఫస్ట్ ఉన్నాడు డార్లింగ్ ప్రభాస్. రీసెంట్ గా రిలీజైన ఆదిపురుష్ సినిమాపై వివాదాలు చెలరేగినా, డివైడ్ టాక్ వచ్చినా కలెక్షన్లు మాత్రం బాగానే వచ్చాయి. ప్రస్తుతం సలార్ మూవీతో బిజీగా ఉన్నాడు ప్రభాస్ బాలీవుడ్ లో ఓ ఘనత సాధించాడు. ‘బాహుబలి’ తర్వాత ‘సాహో’, ‘రాధేశ్యామ్’, ‘ఆదిపురుష్’.. ఇలా మూడు భారీ బడ్జెట్ చిత్రాలతో ప్రేక్షకుల్ని పలకరించాడు. వీటి టాక్ ఏంటనేది పక్కనబెడితే నార్త్ లో ఇవన్నీ కూడా కలెక్షన్స్ లో వావ్ అనిపించాయి. మొత్తం ఈ నాలుగు సినిమాలు ఒక్కొక్కటి కేవలం హిందీలోనే 100 కోట్లు చొప్పున నెట్ వసూళ్లు సాధించాయి. అంటే సౌత్ నుంచి నార్త్ కి వెళ్లి ఈ ఘటన సాధించిన తొలిహీరోగా ప్రభాస్ నిలిచాడు. మరో ఇంటెస్ట్రింగ్ విషయం ఏంటంటే వరుసగా నాలుగు సినిమాలో వంద వంద వంద వంద సాధిస్తే…ఇప్పటి వరకూ ఇంకే దక్షిణాది హీరో కనీసం ఒక్కమూవీతో కూడా బాలీవుడ్ లో వందకోట్ల క్లబ్ లో చేరలేదు. అసలు సిసలు పాన్ ఇండియా స్టార్ ప్రభాస్ అంటూ అభిమానులు ఖుషీ అవుతున్నారు.
అంతా బాహుబలి మహిమే
జక్కన్న ‘బాహుబలి’ సినిమాతో నార్త్ లో ఎంట్రీ ఇచ్చిన ప్రభాస్ ఆ సినిమా తర్వాత నుంచి తన క్రేజ్, మార్కెట్ పెంచుకుంటూ పోయాడు. అందుకే బాహుబలి తర్వాత వచ్చిన సాహో, రాధేశ్యామ్, ఆదిపురుష్ పై పాజిటివ్ టాక్ రాకపోయినా సూపర్ డూపర్ కలెక్షన్లు మాత్రం వచ్చాయి. ఇక బాహుబలి నుంచి ఆదిపురుష్ వరకు 5 చిత్రాల ప్రీ రిలీజ్ బిజినెస్ మొత్తం కలిపితే రూ. 1182 కోట్లు ఉంది. టాలీవుడ్‌లోనే కాదు మన దేశంలోనే అత్యధిక ప్రీ రిలీజ్ బిజినెస్ చేసిన సినిమాలు ప్రభాస్‌వే కావడం ఇంట్రెస్టింగ్. ఒకప్పుడు నార్త్ లో సౌత్ వాళ్ళకి ఆదరణ ఉండేది కాదు. బాలీవుడ్ ఇండస్ట్రీ లో సౌత్ యాక్టర్స్ ని చులకనగా చూసేవారు. చిరంజీవి, నాగార్జున, వెంకటేష్ లాంటి బడా స్టార్లే ఒకటి రెండు ప్రయత్నాలు చేసి లైట్ తీసుకున్నారు. బాహుబలితో సౌత్ రేంజ్ మారిపోవడంతో ఇక్కడి హీరోలకు అక్కడ మంచి ఆదరణ లభిస్తోంది.
వరుస ప్రాజెక్టులతో బిజీ
ప్రస్తుతం ప్రభాస్ ‘కేజీఎఫ్’ దర్శకుడు ప్రశాంత నీల్ తో ‘సలార్’, ‘మహానటి’ దర్శకుడు నాగ్ అశ్విన్ తో ప్రాజెక్ట్ కే, మారుతితో మరోసినిమా చేస్తున్నాడు. వీటిలో ఏ మూవీ ఎలాంటి సంచలనాలు సృష్టింస్తుందో చూడాలి మరి.
