యంగ్ హీరో శర్వానంద్ ఓ ఇంటివాడు అయ్యారు. జూన్ 3వ తేదీ పదకొండు గంటలకు రక్షిత (Sharwanand wife Rakshita) మెడలో మూడు ముళ్ళు వేశాడు. శర్వానంద్, రక్షితల వివాహ మహోత్సవానికి జైపూర్ (Leela Palace Jaipur)లోని లీలా ప్యాలెస్‌ వేదిక అయ్యింది. మూడు నాలుగు రోజుల క్రితమే నూతన వధూవరులతో పాటు ఇరువురి కుటుంబాలు, సన్నిహిత మిత్రులు జైపూర్ వెళ్ళారు. జూన్ 2వ తేదీ ఉదయం హల్దీ వేడుక జరిగింది. అదే రోజు సాయంత్రం సంగీత్ నిర్వహించారు. జూన్ 3వ తేదీ రాత్రి పెళ్లి జరిగింది. శర్వా క్లోజ్ ఫ్రెండ్ రామ్ చరణ్ (Ram Charan)తో పాటు పలువురు సినీ, రాజకీయ ప్రముఖులు ఈ వివాహ వేడుకకు హాజరై కొత్త జంటను ఆశీర్వదించారు.
బొజ్జల గోపాల కృష్ణ మనవరాలు రక్షిత
శర్వానంద్ పెళ్లి చేసుకున్న అమ్మాయి పేరు రక్షిత రెడ్డి. ప్రస్తుతం సాఫ్ట్ వేర్ ఉద్యోగిగా పని చేస్తోంది. తెలంగాణ హైకోర్టు న్యాయవాది మధుసూదన్ రెడ్డి కుమార్తె రక్షిత. మాజీ మంత్రి బొజ్జల గోపాల కృష్ణ మనవరాలు కూడా. జనవరి 26న వీరి నిశ్చితార్థం నిరాడంబరంగా జరిగింది. పెళ్లి కూడా సన్నిహిత మిత్రుల మధ్య చేసుకున్నాడు శ్వరానంద్. మ్యారేజ్ ఫోటోలను ఇంకా అధికారికంగా విడుదల చేయలేదు కానీ సోషల్ మీడియాలో మాత్రం చక్కర్లు కొడుతున్నాయి.
కెరీర్ పరంగా చూస్తే శర్వానంద్ వరుస సినిమాలతో బిజీగా ఉన్నాడు. పెళ్ళికి ముందు నటించిన ‘ఒకే ఒక జీవితం’ తెలుగు, తమిళ భాషల ప్రేక్షకులను మెప్పించింది. ప్రస్తుతం శ్రీరామ్ ఆదిత్య దర్శకత్వంలో శర్వానంద్ ఓ సినిమాలో నటిస్తున్నాడు. పీపుల్స్ మీడియా ఫ్యాక్టరీ పతాకంపై టీజీ విశ్వప్రసాద్ నిర్మిస్తున్న ఆ సినిమాలో కృతి శెట్టి హీరోయిన్. సితార సంస్థలో కూడా మరో ప్రాజెక్ట్ కి సైన్ చేశాడు. మరోవైపు రవితేజతో కలసి ఓ మల్టీస్టారర్ మూవీకి గ్రీన్ సిగ్నల్ ఇచ్చాడు. ‘కలర్ ఫొటో’ దర్శకుడు సందీప్ రాజ్ తెరకెక్కించనున్న ఆ సినిమాలో రవితేజ లెక్చరర్ గా శర్వానంద్ స్టూడెంట్ గా కనిపించనున్నారని టాక్.
2003లో విడుదలైన ‘ఐదో తారీఖు’ సినిమాతో వెండితెరకు పరిచయమైన శర్వానంద్ పలు సినిమాలలో చిన్న చిన్న పాత్రల్లో నటించాడు. ఆ తర్వాత చిరంజీవితో థమ్స్ అప్ యాడ్‌లో, శంకర్ దాదా MBBS సినిమాలో చిన్న పాత్రలో నటించాడు. వెంకటేష్‌తో ‘సంక్రాంతి’, ‘లక్ష్మి’ సినిమాల్లో తమ్ముడిగా నటించాడు. ‘గమ్యం’ సినిమాతో సూపర్ సక్సెస్ అందుకున్నాడు…ప్రస్థానం, శతమానం భవతి, మహానుభావుడ, ఒకే ఒక జీవితం సినిమాలతో మంచి పేరు సంపాదించుకున్నాడు
