తెలుగు సినిమాల్లో మెంబై మోడల్స్ హవా తగ్గిందా అంటే అవుననే చెప్పాలి. ఒకప్పుడు ఏ సినిమాలో చూసినా, చివరకు ఐటెం సాంగ్స్ కూడా ముంబై భామలనే దింపేవారు. కానీ ఇప్పుడంతా న్యాచురల్ బ్యూటీస్ పై మనసు పడ్డారు. ఏ సినిమాలో చూసినా కేరళ కుట్టీలే కనిపిస్తుంది. ఐదారేళ్లుగా గమనిస్తే మాలీవుడ్ బ్యూటీల సందడి టాలీవుడ్ లో పెరుగుతూ వచ్చింది. తెలుగులోనే కాదు సౌత్ మూవీస్ లో ఎక్కడ చూసినా కేరళ బ్యూటీలే కనిపిస్తున్నారు. అప్పుడెప్పుడో ఎంట్రీ ఇచ్చిన నయనతార ఇప్పటికీ వెలుగుతూనే ఉంది. నిత్యామీనన్ కూడా అంతే. అయితే దశాబ్ధ కాలం నుంచి సంగతి పక్కనపెడితే ప్రస్తుతం తెలుగులో వెలుగుతున్న హీరోయిన్స్ అందరూ మాలీవుడ్ నుంచి వచ్చినోళ్లే. కీర్తి సురేష్, సంయుక్తామీనన్, మాళవికా మోహనన్ సహా ఈ లిస్టు పెద్దదే…
మహానటితో కెరీర్ జోరు పెంచిన కీర్తి సురేష్ టాలీవుడ్ స్టార్ హీరోయిన్ హోదా అనుభవిస్తోంది. టాలీవుడ్ లో ఎంట్రీ ఇచ్చిన కొత్తలో ఈమె మొహంలో ఎలాంటి భావాలు లేవని కామెంట్స్ చేసినవారే..మహానటి సినిమాలో సావిత్రి పాత్రలో కీర్తిని చూసి అవాక్కయ్యారు. ఆ తర్వాత ఓ జోనర్ సినిమాలకే పరిమితం కాకుండా విభిన్నమైన కథలు ఎంపికచేసుకుంటూ కెరీర్లో దూసుకుపోతోంది కీర్తి.
సంయుక్తా మీనన్ గురించి ప్రత్యేకంగా చెప్పడానికేముంది. ప్రస్తుతం టాలీవుడ్ లో మోస్ట్ వాంటెండ్ హీరోయిన్ ఈమె. ఏ ముహూర్తాన ఎంట్రీ ఇచ్చింది కానీ నటించిన సినిమాలన్నీ హిట్లే. భీమ్లానాయక్, బింబిసార, సార్, రీసెంట్ గా వచ్చిన విరూపాక్ష..అన్నీ సూపర్ హిట్టవడంతో రానున్న రోజుల్లో స్టార్ హీరోయిన్ రేసులో ముందుంది సంయుక్తామీనన్.
కేరళ బ్యూటీ మాళవిక మోహనన్… తమిళ చిత్రాలతో మంచి గుర్తింపు తెచ్చుకుంది. ముఖ్యంగా తమిళ స్టార్ విజయ్ దళపతి సరసన ‘మాస్టర్’ మూవీ బ్రేక్ ఇచ్చింది. ఈ ప్రస్తుతం చియాన్ విక్రమ్ తో కలసి ‘తంగలాన్’లో నటిస్తోంది. టాలీవుడ్ లో నేరుగా నటిస్తోన్న తొలి సినిమాకే ప్రభాస్ తో ఛాన్స్ కొట్టేసింది. ప్రభాస్-మారుతి కాంబినేషన్లో తెరకెక్కుతోన్న సినిమాలో మాళవిక నటిస్తోంది. ఈ మూవీ హిట్టేతే మాళవిక జోరు మాములుగా ఉండదు.
నివేధా థామస్, మాళవికా నాయర్ సహా ఇంకా కేరళ నుంచి వచ్చిన బ్యూటీలంతా అందం,నటనలో మంచి మార్కులు సంపాదించుకున్నారు. నటనలో సహజత్వం,ఆకట్టుకునే రూపం, అచ్చ తెలుగు అమ్మాయిలా కనిపించడమే ఇందుకు ప్రధాన కారణం. ఒకప్పుడు ముంబై నుంచి చాలామంది మోడల్స్ దిగుమతి అయ్యేవారు. ప్రస్తుతం అయితే మాత్రం టాలీవుడ్ దర్శక-నిర్మాతలు హీరోయిన్ల ఎంపిక విషయంలో కేరళ బ్యూటీలకే ఎక్కువ ప్రయార్టీ ఇస్తున్నారు. ఆ తర్వాత బెంగళూరు, చెన్నై భామలకు ఓటేస్తున్నారు. మరీ బోల్డ్ నెస్ ఎక్కువ ఉండే పాత్ర అయితే ఛలో ముంబై అంటున్నారు. ఓవరాల్ గా చూసుకుంటే ప్రస్తుతం తెలుగు ఇండస్ట్రీలో కేరళ బ్యూటీలదే పైచేయి అని చెప్పుకోవాలి.
