ముఖ్యమంత్రి వైఎస్ జగన్మోహన్ రెడ్డి ఆశ‌లన్నీ ఈసారి మహిళలపైనే అని రాష్ట్ర రెవెన్యూ శాఖ మంత్రి ధర్మాన ప్రసాదరావు అన్నారు. సీఎం జగన్‌కు మళ్లీ అధికారం ద‌క్కించే బాధ్యత మహిళల చేతుల్లోనే ఉందన్నారు. మిమ్మల్ని క‌న్న కొడుకులా చూసుకునే వారికి అధికారం ఇస్తారో, ఇవ్వరో మీరే ఆలోచించుకోవాలన్నారు. ఈ మేరకు శ్రీకాకుళంలో మంత్రి ధర్మాన మీడియాతో మాట్లాడుతూ.. సీఎం జగన్‌కు ఈసారి ఓటు వేసి అధికారం ఇవ్వకపోతే మహిళలే న‌ష్టపోతారని చెప్పారు. జగన్ ప్రభుత్వాన్ని మళ్లీ గెలిపించకపోతే మీ రెండు చేతులు మీరు నరుక్కున్నట్టేనని పేర్కొన్నారు.
ఓటు వేసేట‌ప్పుడు మ‌న‌సు చెప్పిన మాట ప్రకారం వేయాలని మంత్రి ధర్మాన తెలిపారు. మీకు ఎంతో మేలు చేసిన ప్రభుత్వానికి మరోసారి అధికారం ఇవ్వాల‌ని గుర్తుపెట్టుకొని ఓటు వేయాలన్నారు. ఇచ్చిన మాట‌కు క‌ట్టుబ‌డి ఉండే జగన్మోహన్ రెడ్డికి మరోసారి అధికారం ఇస్తారో.. మాట త‌ప్పి, హామీలు నీరుగార్చే దొంగ అయిన చంద్రబాబుకు ఇస్తారో మీ ఇష్టమన్నారు.
అయితే, ముఖ్యమంత్రి జగన్మోహన్ రెడ్డి ఇస్తున్న పథకాలను ఆయన ఇంట్లోవి ఇస్తున్నారా అని కొంతమంది మహిళలు అంటున్నారని.. ఎవరైనా ఇంట్లోది ఇస్తామంటే వారి ఇంటికే వెళదామని మంత్రి ధర్మాన అన్నారు. పథకాల డబ్బులు తీసుకుని కూడా సంస్కారవంతమైన మాట రాకపోతే ఎలా అని ప్రశ్నించారు. వచ్చే ఎన్నికల్లో తాను గెలువకపోతే వచ్చే నష్టం ఏం లేదని.. తాను పోటీ చేయడం, గెలవడం అనేది అసలు ఇష్యూ కాదన్నారు. గెలిస్తే మీ చాకిరీ చేస్తా… ఓడిపోతే మీ స్నేహితుడిగా ఉంటానన్నారు. ప్రజల వైపు ఆలోచించే ప్రభుత్వాన్ని మీరు గెలిపించుకోవాలని సూచించారు.
తాను కొన్ని సిద్ధాంతాలు, భావజాలలపై పని చేస్తానని, తన పదవితో తనకు సంబంధం లేదని మంత్రి ధర్మాన చెప్పారు. గత 40 సంవత్సరాలుగా తన గౌరవాన్ని తగ్గించేందుకు కొందరు ప్రయత్నం చేస్తున్నారని… కానీ, ఒక్క ఇంచ్ కూడా తగ్గలేదన్నారు. చెప్పడానికి ఏం లేక నిత్యావసర సరుకుల ధరలు పెరిగాయని కొందరు సాకులు చెబుతున్నారని ఆగ్రహం వ్యక్తం చేశారు. మీ బంధువుల ద్వారా సరుకుల ధరలపై ఇతర రాష్ట్రాల్లో వాకాబు చేయాలని సూచించారు.
