ఏడాది పాటూ బ్రేక్ అన్న సమంత ప్రకటన చూసి సినీ లవర్స్ చాలా బాధపడ్డారు. సక్సెస్ ఫుల్ హీరోయిన్ గా వెలిగిన వెలుగుతున్న సామ్ ఏడాది పాటూ కనిపించదంటే ఆ మాత్రం డిస్కషన్ జరుగుతుంది మరి. కొత్త ప్రాజెక్టులేవీ చేసేది లేదని తేల్చి చెప్పేసింది.ఇంతకీ రీసెంట్ గా షూటింగ్ పూర్తిచేసిన ‘ఖుషి’ మూవీ ప్రమోషన్లో పాల్గొంటుందా లేదా అన్నదే డిస్కషన్. ఒకవేళ సామ్ రాకపోతే మొత్తం బాధ్యతంతా విజయ్ దేవరకొండదేనా
ప్రమోషన్ కి సామ్ వస్తుందా!
భారీ అంచనాలతో విడుదలైన పూరీ జగన్నాథ్ ‘లైగర్’ సినిమా విజయ్ దేవరకొండ (Vijay Devarakonda) అభిమానులను తీవ్రంగా నిరాశపర్చింది. ఆ సినిమా కోసం రౌడీ హీరో చాలా టైమ్ కేటాయించినా ఫలితం లేకపోయింది. ఆ ఫ్లాప్ లో కూరుకుపోయి ఉండిపోకుండా వరుస ప్రాజెక్టులపై సైన్ చేసిన విజయ్.. మొదట ఖుషి సినిమాతో వచ్చేందుకు సిద్ధమయ్యాడు. వాస్తవానికి లైగర్ విడుదైన వెంటనే ఖుషి సినిమా రావాల్సి ఉన్నా సమంత
(Samantha) అనారోగ్య సమస్యల కారణంగా షూటింగ్ ఆలస్యం అయ్యింది. ఎట్టకేలకు ‘ఖుషి’ (Kushi) సినిమా షూటింగ్ పూర్తి అయ్యింది. మరోవైపు సిటాడెల్ వెబ్ సిరీస్ షూటింగ్ కూడా పూర్తైంది. అందుకే బ్రేక్ తీసుకుంటున్నట్టు ప్రకటించింది. ఏడాది పాటూ మళ్లీ కెమెరా ముందికి వచ్చే అవకాశం లేదని క్లారిటీ వచ్చేసింది. దీంతో మరి ఖుషి సినిమా ప్రమోషన్ కార్యక్రమాలకు ఆమె హాజరు కాకపోవచ్చు అనే టాక్ వినిపిస్తుంది.
లేడీ ఓరియెంటెడ్ మూవీకి తప్పలేదు
‘యశోద’ సినిమా విడుదల సమయంలో ఆమె తీవ్ర అనారోగ్య సమస్యలతో ఉన్నా కూడా మీడియా ముందుకు వచ్చింది. ప్రెస్ మీట్స్ లో చాలా ఇబ్బంది పడింది. ఆ మూవీ లేడీ ఓరియెంటెడ్ సినిమా కాబట్టి తప్పలేదు. సమంత రావాల్సి వచ్చింది. కానీ ఇప్పుడు ఖుషి సినిమా విషయానికొస్తే విజయ్ దేవరకొండ మొత్తం హ్యాండిల్ చేసేయగలడు. అందుకే సమంత రాకపోయినా పెద్దగా నష్టపోయేదేం ఉండదన్నది కొందరి అభిప్రాయం. పైగా సామ్ పరిస్థితి అందరికీ తెలుసు కాబట్టి ఆమె రావాలని ఎవ్వరూ కోరుకోరని మరికొందరు అంటున్నారు. అన్నిటికీ మించి శివనిర్వాణ మూవీ కావడంతో తప్పనిసరిగా ఫీల్ గుడ్ అనిపిస్తుంది..సో ప్రమోషన్ పెద్దగా లేకపోయినా ప్రేక్షకులను ఆకట్టుకోవడం పక్కా అని ఫిక్సైపోయారు.
సెప్టెంబర్ 1న ఖుషి విడుదల
సమంత – విజయ్ దేవరకొండ నటిస్తున్న ‘ఖుషి’ సినిమా పై ఇప్పటికే భారీ అంచనాలున్నాయి. వీరిద్దరి లుక్స్, ఇప్పటికే విడుదలైన పోస్టర్లు, పాటలు ఆడియన్స్ ని ఆకట్టుకున్నాయి. హేషామ్ అబ్దుల్ వాహాబ్ (hesham Abdul Wahab) సంగీతం అందిస్తున్నాడు. ‘నా రోజా నువ్వే’ పాటను పాడింది కూడా హేషామ్ కావడం విశేషం. పాన్ ఇండియా సినిమాగా తెరకెక్కుతోన్న ‘ఖుషి’ తెలుగుతో పాటు తమిళ, కన్నడ, మలయాళ, హిందీ భాషల్లో సెప్టెంబర్ 1న ప్రపంచ వ్యాప్తంగా విడుదల కానుంది. లైగర్ తో డిజాస్టర్ అందుకున్న విజయ్ కి ఖుషి మూవీ బ్లాక్ బస్టర్ హిట్టు అందిస్తుందని రౌడీ ఫ్యాన్స్ ఫిక్సైపోయారు. మరోవైపు బ్రేక్ తీసుకునేముందు సమంత నటించిన ఈమూవీతో పాటూ సిటాడెల్ వెబ్ సిరీస్ కూడా ఆమె లక్కీ హీరోయిన్ అని మరోసారి ప్రూవ్ చేస్తాయంటున్నారు.
