పవర్ స్టార్ పవన్ కల్యాణ్ – సుప్రీమ్ హీరో సాయి ధరమ్ తేజ్ కలిసి నటిస్తోన్న సినిమా ‘బ్రో’ (BRO). సముద్రఖని దర్శకత్వంలో తెరకెక్కుతోన్న ఈ సినిమా తమిళంలో సూపర్ హిట్ అయిన ‘వినోదయ సీతమ్’కు రీమేక్. క్రేజీ కాంబోలో వస్తున్న ఈ మూవీపై అంచనాలు ఓ రేంజ్ లో ఉన్నాయి.
మెగా ఫ్యామిలీకి చెందిన ఇద్దరు క్రేజీ హీరోలు కలిసి నటిస్తోన్న ఈ సినిమాకు సంబంధించి వరుస అప్ డేట్స్ ఫ్యాన్స్ ని మెస్మరైజ్ చేస్తూనే ఉన్నాయి. ఇప్పటికే ఈ మూవీ నుంచి పవన్ కళ్యాణ్ ఫస్ట్ లుక్, సాయి ధరమ్ తేజ్ ఫస్ట్ లుక్ పోస్టర్లు రిలీజ్ చేశారు. ఇద్దరూ కలసి ఉన్న పోస్టర్ కావాలంటూ ఫ్యాన్స్ కోరిక మేరకు మెగా మేనమామ మెగా మేనల్లుడు కలసి ఉన్న పోస్టర్ రిలీజ్ చేశారు మేకర్స్. ముందుగా ప్రకటించినట్టే సోమవారం ఉదయం ‘బ్రో’ మూవీ నుంచి అదిరిపోయే పోస్టర్ రిలీజ్ చేశారు. పవన్ బైక్ మీద కాలు పెట్టి నిలబడగా, ఆయన మోకాలు మీద చెయ్యిపెట్టి సాయి తేజ్ నిల్చున్నాడు. ప్రస్తుతం ఈ పోస్టర్ కు భారీ స్పందన వస్తోంది.
దేవుడు-భక్తుడి మధ్య సాగే కథనం
దేవుడు – భక్తుడి మధ్య ఆసక్తికరమైన కథాంశంలో రూపొందించిన ఈ సినిమా తమిళ వెర్షన్లో సముద్ర ఖని – తంబి రామ‌స్వామి ప్రధాన పాత్రల్లో నటించారు. తెలుగులో కూడా సముద్రఖని దర్శకత్వం వహిస్తున్నప్పటికీ తెలుగు నేటివిటీకి తగ్గట్టుగా మార్పులు చేర్పులు చేస్తున్నాడు త్రివిక్రమ్. ఒరిజినల్ సినిమా నుంచి థీమ్ ని మాత్రమే తీసుకుని మార్పులు చేశారని టాక్. ఇందులో పవన్ టైమ్ ఆఫ్ గాడ్ పాత్రను పోషిస్తున్నప్పటికీ రీసెంట్ గా రిలీజ్ చేసిన మోషన్ పోస్టర్ లో ఓంకారం కనిపించడం, శివుడి గురించి ప్రస్తావించడాన్ని గమనించవచ్చు.
జూలై 28న విడుదల
జీ స్టూడియోస్ సమర్పణలో పీపుల్ మీడియా ఫ్యాక్టరీ పతాకంపై టి.జి. విశ్వప్రసాద్ నిర్మిస్తున్న ఈ సినిమాకి వివేక్ కూచిభొట్ల సహ నిర్మాత. ఎస్ థమన్ సంగీత దర్శకుడు. కేతిక శర్మ, ప్రియ ప్రకాష్ వారియర్ హీరోయిన్స్ కాగా… సముద్ర ఖని, రోహిణి, తనికెళ్ళ భరణి, వెన్నెల కిషోర్, సుబ్బరాజు, నర్రా శ్రీను, అలీ రెజా ఇతర పాత్రలు పోషిస్తున్నారు. ఇందులోనే ఓ స్పెషల్ సాంగ్ ఉంటుందని… శ్రుతిహాసన్, దిశా పటాని ఇద్దర్లో ఎవరో ఒకరు ఫైనల్ అవుతారని టాక్. ఇప్పటికే షూటింగ్ చివరి దశకు వచ్చినట్టే. త్వరలోనే పోస్ట్ ప్రొడక్షన్ వర్క్ పూర్తిచేసి జూలై 28న ప్రపంచవ్యాప్తంగా భారీస్థాయిలో విడుదల చేయడానికి మేకర్స్ సన్నాహాలు చేస్తున్నారు.
