సీనియర్ హీరో నందమూరి బాలకృష్ణ కెరీర్లో గతంలో ఎప్పుడూ లేనంత జోరుమీదున్నారు. ‘అఖండ’తో సక్సెస్ ట్రాక్ ఎక్కిన బాలకృష్ణ ‘వీర సింహా రెడ్డి’, ‘భగవంత్ కేసరి’ వంటి విజయాలతో దూసుకుపోతున్నాడు. హ్యాట్రిక్ హిట్స్ కొట్టిన తర్వాత నటసింహం క్రేజ్ ఒక్కసారిగా పెరిగిపోయింది. దీంతో అగ్ర నిర్మాణ సంస్థలు ఆయనతో సినిమాలు చేయటానికి అడ్వాన్సులు ఇస్తున్నారు. ఇదే జోష్ లో బాలయ్య కూడా యంగ్ డైరెక్టర్స్ కే ఓటేస్తున్నారు.
బాలయ్య – బాబి
బాలకృష్ణ ప్రస్తుతం కొల్లు బాబీ దర్శకత్వంలో NBK109 సినిమాలో నటిస్తున్నారు. సితార ఎంటర్టైన్మెంట్స్ బ్యానర్ లో ఈ పవర్ ఫుల్ యాక్షన్ ఎంటర్టైనర్ తెరకెక్కుతోంది. ఇందులో దుల్కర్ సల్మాన్ కీలక పాత్ర పోషిస్తుండగా.. బాబీ డియోల్ విలన్ గా నటిస్తున్నారు. శరవేగంగా షూటింగ్ జరుపుకుంటున్న ఈ చిత్రాన్ని ఈ ఏడాదే ప్రేక్షకుల ముందుకి తీసుకొచ్చే ప్లాన్ లో ఉన్నారు.
బాలయ్య – రాహల్ సాంకృత్యన్
బాలకృష్ణ కెరీర్ లో క్లాసిక్ గా నిలిచిపోయిన ‘ఆదిత్య 369’ చిత్రానికి సీక్వెల్ చేయనున్నట్లు రెండేళ్ల క్రితమే ప్రకటించారు. ‘ఆదిత్య 999 మ్యాక్స్’ అనే టైటిల్ తో ప్లాన్ చేసిన ఈ సినిమాకు బాలయ్యే స్వయంగా కథ రెడీ చేస్తున్నారు. వీలైతే తన స్వీయ దర్శకత్వంలోనే తెరకెక్కించాలని అనుకున్నారు కానీ ఇప్పుడు ఓ యువ దర్శకుడి చేతిలో ఆ ప్రాజెక్ట్ ను పెట్టాలని చూస్తున్నారట. దీని కోసం ‘శ్యామ్ సింగ రాయ్’ ఫేమ్ రాహుల్ సాంకృత్యన్ తో చర్చిస్తున్నారని, మైత్రీ మూవీ మేకర్స్ ఈ చిత్రాన్ని నిర్మించనున్నారని టాక్…
బాలయ్య – ప్రశాంత్ వర్మ
బాలయ్యతో మూవీ చేయటానికి చాలాకాలంగా వెయిట్ చేస్తున్నారు టాలెంటెడ్ డైరెక్టర్ ప్రశాంత్ వర్మ. వీరిద్దరూ గతంలో ‘అన్ స్టాపబుల్ విత్ NBK’ ప్రోమో కోసం వర్క్ చేశారు. ‘హను-మాన్’ బ్లాక్ బస్టర్ హిట్టయిన తర్వాత ఈ కాంబినేషన్ మరోసారి చర్చకు వచ్చింది. ‘జై హనుమాన్’ ప్రాజెక్ట్ కంప్లీట్ అయిన తర్వాత ఈ క్రేజీ కాంబోలో సినిమా ఉండే అవకాశాలు కనిపిస్తున్నాయి. సుధాకర్ చెరుకూరి ఈ చిత్రాన్ని నిర్మిస్తారనే టాక్ ఉంది.
వెంకటేశ్ మహా లాంటి మరికొందరు యువ దర్శకులు కూడా ఛాన్స్ దొరికితే బాలకృష్ణతో వర్క్ చేయాలని చూస్తున్నారు. నిజానికి బాలకృష్ణ మాత్రమే కాదు మిగతా టాలీవుడ్ సీనియర్ హీరోలంతా ఇప్పుడు కుర్ర దర్శకులతో పని చేయడానికి ఆసక్తి చూపిస్తున్నారు. నాగార్జున ‘నా సామిరంగా’ సినిమాతో విజయ్ బిన్నీ వంటి కొత్త దర్శకుడిని ఇండస్ట్రీకి పరిచయం చేశారు. నెక్స్ట్ మూవీ కోసం ఇప్పుడు నవీన్ అనే తమిళ్ డైరెక్టర్ తో చర్చలు జరుగుతున్నారని టాక్. ‘బింబిసార’ ఫేమ్ వశిష్ఠ మల్లిడి దర్శకత్వంలో ‘విశ్వంభర’ సినిమా చేస్తున్నారు చిరంజీవి. యువ దర్శకుడు శైలేష్ కొలనుతో కలిసి ‘సైంధవ్’ మూవీ చేశారు వెంకటేష్.
