అటల్ బిహారీ వాజ్ పేయి ఈ పేరు చెబితే దేశ ప్రజల పెదాలపై చిరునవ్వు వస్తుంది. దీనికి కారణం విలువలకు కట్టుబడిన రాజకీయాలు చేయడమే కాదు.. దేశాన్ని పకడ్బందీగా అభివవృద్ధి పథంలో నడిపించడంలో కీలక పాత్ర పోషించిన నేత. అణుపరీక్షలతో దేశాన్ని అగ్రదేశాల సరసన నిలబెట్టారు. మహోన్నతుడైన వాజ్ పేయి జయంతి ఈ రోజు.
వ్యక్తిత్వంలో ప్రత్యేకం వాజ్‌పేయి
ఒక్క ఎంపీని ఆకర్షిస్తే ప్రభుత్వాన్ని నిలబెట్టుకోవచ్చు. కానీ వాజ్ పేయి అలాంటి ప్రయత్నం చేయలేదు. హుందాగా రాజకీయం చేసి ప్రభుత్వం పడిపోతే ప్రజల వద్దకు వెళ్లారు. అంతే కానీ కొనుగోలు రాజకీయాలు చేయలేదు. ప్రధానిగా ఆయన వరుసగా ఐదేళ్లు మాత్రమే పరిపాలించి ఉండవచ్చు కానీ..దేశంపై ఆయన వేసిన ముద్ర ఇప్పటికీ ఉంది. స్వర్ణ చతుర్భుజి ప్రాజెక్టుతో జాతీయరహదారులు దేశం మొత్తం కనిపిస్తున్నాయి. దేశాభివృద్ధికి అవే చొదకాలుగా మారాయి.
చిన్న తనం నుంచి దేశం కోసమే వాజ్ పేయి జీవితం
అటల్ బిహారీ వాజ్ పేయి 1924 డిసెంబర్ 25 మధ్యప్రదేశ్‌లోని గ్వాలియర్‌లో బ్రాహ్మణ కుటుంబంలో జన్మించారు. తల్లిదండ్రులు కృష్ణాదేవి, కృష్ణబిహారీ వాజ్ పేయి. గ్వాలియర్ సరస్వతి శిశు మందిర్‌లో చదువుకున్నారు. కాన్పూర్ దయానంద ఆంగ్లో వైదిక కళాశాల నుంచి రాజనీతి శాస్త్రంలో ఎం.ఎ పట్టాను పొందారు. 1939 లో ఆర్ఎస్ఎస్‌లో చేరారు. దేశ విభజన తర్వాత జరిగిన అల్లర్ల కారణంగా న్యాయవిద్యను మధ్యలోనే ఆపేశారు. వాజ్ పేయి రాష్ట్రధర్మ, పాంచజన్య, స్వదేశ్, వీర్ అర్జున్ హిందీ పత్రికల్లో పనిచేశారు. 1942 ఆగస్టులో క్విట్ ఇండియా ఉద్యమ సమయంలో తన అన్న ప్రేమ్‌తో కలిసి అరెస్టై 23 రోజులు జైల్లో గడిపారు. ఆ తరువాత ఆయనకు రాజకీయాలతో పరిచయం ఏర్పడింది.
వాజ్‌పేయి ప్రధాని అవుతారని ముందే ఊహించిన నెహ్రూ
1957 లో వాజ్ పేయి బల్రామ్ పూర్ నియోజకర్గం నుంచి లోక్ సభకు ఎన్నికయ్యారు. ఆయన వాగ్ధాటిని గమనించిన జవహర్ లాల్ నెహ్రూ ఏదో ఒక రోజు వాజ్ పేయి దేశ ప్రధాని అవుతారని ఊహించారట.
1977 సార్వత్రిక ఎన్నికల్లో న్యూ ఢిల్లీ నుంచి జనతా పార్టీ విజయం తరువాత మొరార్జీ దేశాయ్ మంత్రివర్గంలో విదేశీ వ్యవహారాల శాఖ మంత్రిగా వాజ్ పేయి పనిచేశారు. 1980 లో భారతీయ జనతా పార్టీ ఏర్పరచి మొట్ట మొదటి అధ్యక్షుడిగా పనిచేశారు. 1994 కర్నాటక అసెంబ్లీ ఎన్నికల తరువాత బీజేపీ జాతీయ స్ధాయిలో అతి పెద్ద రాజకీయ పార్టీగా అవతరించింది. 1995 నవంబర్‌లో ముంబయిలో జరిగిన సమావేశంలో అప్పటి బీజేపీ అధ్యక్షుడైన లాల్ కృష్ణ అద్వానీ వాజ్ పేయిని ప్రధాని అభ్యర్థిగా ప్రకటించారు. 1996 నుంచి 2004 మధ్యలో వాజ్ పేయి మూడుసార్లు ప్రధానమంత్రిగా బాధ్యతలు నిర్వహించారు.
వాజ్ పేయి పరిపాలనా కాలంలో ఆర్ధిక, మౌలిక సంస్కరణలు చేపట్టారు. ప్రైవేటు రంగాన్ని, విదేశీ పెట్టుబడులను ప్రోత్సహించారు. కొన్ని ప్రభుత్వ రంగ సంస్థల్లో పరిశోధన, అభివృద్ధిని ప్రోత్సహించారు. కొన్ని ప్రభుత్వ రంగ సంస్థలను ప్రైవేటీకరించారు.
వాజ్‌పేయి హయాంలో గొప్ప విజయాలు సాధించిన దేశం
వాజ్ పేయి పరిపాలన కాలంలోనే 1998 లో పోఖ్రాన్ అణు పరీక్ష, 1999 లో కార్గిల్ యుద్ధంలో భారత్ విజయం సాధించాయి. 2001 లో డిసెంబర్‌లో పార్లమెంటు భవనంపై దాడి జరిగింది. 1999 ఫిబ్రవరిలో ఢిల్లీ-లాహోర్ బస్సు సర్వీస్ ప్రారంభం అయ్యింది. ఇది భారత్, పాక్ సంబంధాల అంశంలో చారిత్రాత్మక ఘట్టంగా చెప్పాలి. 2005 డిసెంబర్‌లో వాజ్ పేయి క్రియాశీల రాజకీయాల నుంచి నిష్ర్రమిస్తున్నట్లు ప్రకటించారు. 2009లో స్ట్రోక్ కారణంగా పక్షవాతానికి గురై ఆయన మాట క్షీణించింది. 2018 ఆగస్టు 16 న వాజపేయి ఢిల్లీలో మరణించారు. వాజ్ పేయి దేశానికి అందించిన సేవలకు గాను అనేక సత్కారాలు అందుకున్నారు. భారతదేశ అత్యున్నత పురస్కారం ‘భారత రత్న’ తో ఆయనను 2014 సత్కరించారు.
