తెలంగాణ అసెంబ్లీ ఎన్నికలు పూర్తి స్థాయిలో హోరాహోరీగా సాగుతున్నాయి. ఇందులో సందేహం లేదు. ఎక్కువ మంది హంగ్ వస్తుందని అంచనా వేస్తున్నారు. ఒక వేళ హంగ్ అంటూ వస్తే.. కింగ్ అయ్యేది బీజేపీనేనన్న అంచనాలు ఇప్పటికే తెలంగాణ రాజకీయవర్గాల్లో విస్తృతంగా జరుగుతోంది. దీనికి కారణం… రాజకీయ పరిస్థితులు మాత్రమే కాదు.. బీజేపీ వ్యూహాలు కూడా.
బీజేపీనే ప్రభుత్వం ఏర్పాటు చేసేలా పక్కా ప్రణాళిక
బీజేపీ హైకమాండడ్ కు ఓ స్పష్టమైన విజన్ ఉంటుంది. ఏదైనా రాష్ట్రంలో పోటీ చేస్తున్నప్పుడు బలాబలాల్ని అంచనా వేసుకుని తాము గెలవగలిగే సీట్లపై పూర్తి స్థాయిలో దృష్టిపెడతారు. బలహీనంగా ఉన్న చోట్ల సమయం వెచ్చించరు. తెలంగాణ విషయంలోనూ అదే ఫాలో అవుతున్నారు. గెలుపు అంటే… మెజార్టీ సాధించడం మాత్రమే కాదు.. అలా సాధించడం క్లిష్టంగా మారినప్పుడు ప్రభుత్వాన్ని ఏర్పాటు చేసే వ్యూహాన్ని అమలు చేయాలి. అదే అమలు చేస్తున్నారు. ప్రభుత్వ ఏర్పాటు అనేది తమ చేతుల్లో ఉండే అన్ని సీట్లు సాధించాలని టార్గెట్ పెట్టుకున్నారు. అందు కోసం బీజేపీకి క్లియర్ చాన్సులు ఉన్న 23 స్థానాలపై దృష్టి పెట్టారు.
బీజేపీకి 23 సీట్లు ఖాయమా ?
తెలంగాణ బీజేపీ ఇరవై మూడు అసెంబ్లీ సీట్లను సీరియస్ గా తీసుకుంది. అక్కడ పూర్తి స్థాయిలో దృష్టి కేంద్రీకరిస్తోంది. వచ్చే ఎన్నికల్లో ఎలాగైనా హంగ్ తీసుకు రావాలని .. తాము కింగ్ మేకర్లం లేదా కింగ్ కావాలని గట్టి పట్టుదలగా ఉంది. అందుకే గతంలో బలంగా ఉన్న… రెండో స్థానంలో నిలిచిన… గత పార్లమెంట్ ఎన్నికల్లో మెజార్టీ సాధించిన సీట్లపైనే ఎక్కువ దృష్టి పెడుతోంది. ఈ జాబితాలో మొత్తం 23 సీట్లు ఉన్నాయి. గత అసెంబ్లీ ఎన్నికల్లో ఉమ్మడి ఆదిలాబాద్ జిల్లాలో ముథోల్ వంటి చోట్ల రెండో స్థానంలో నిలిచింది. పార్లమెంట్ ఎన్నికల నాటికి కరీంనగర్, నిజామాబాద్, ఆదిలాబాద్ లోక్ సభ నియోజకవర్గాల పరిధిలో దాదాపుగా పన్నెండు స్థానాల్లో బీఆర్ఎస్ కంటే ఎక్కువ మెజార్టీ సాధించింది. ఈ స్థానాలన్నింటిలోనూ బీజేపీ గట్టిగా ప్రయత్నిస్తోంది.
గ్రేటర్ తో పాటు మరికొన్ని బలమైన నియోజకవర్గాలు
అలాగే గ్రేటర్ పరిధిలో కార్పొరేషన్ ఎన్నికల్లో మంచి ఫలితాలు సాధించింది. అక్కడ పలు నియోజకవర్గాల్లో బీజేపీ పరిస్థితి అంచనా వేసుకుని కొన్ని నియోజకవర్గాలపై గురి పెట్టింది. మహబూబ్ నగర్ జిల్లలాలో కల్వకుర్తి వంటి చోట్ల విజయానికి తగ్గరగా వచ్చి ఆగిపోతుంది. ఇలాంటి నియోజకవర్గాలన్నీ ఎంపిక చేసుకుని బలమైన అభ్యర్థులు ఉన్నారనుకున్న చోట్ల గట్టి ప్రయత్నాలు చేస్తోంది. ఇరవై మూడు సీట్లలో విజయం సాధిస్తే సీన్ మొత్తం మారిపోతుంది.
బీజేపీకి ఇరవై మూడు సీట్లు వస్తే.. బీఆర్ఎస్, కాంగ్రెస్ విజయానికి దూరం అవుతాయి. ఏదైనా పార్టీ బీజేపీకి మద్దతు ఇవ్వాల్సిన పరిస్థితి రావొచ్చు. గతంలో కర్ణాటక తరహా పరిణామాలు ఏర్పడే చాన్స్ ఉంది.
