స్టార్ హీరోయిన్ అనుష్క శెట్టి , యంగ్ హీరో నవీన్ పోలిశెట్టి కాంబినేషన్‍లో రూపొందిన ‘మిస్ శెట్టి.. మిస్టర్ పోలిశెట్టి’ సినిమా కోసం చాలా మంది వేచిచూస్తున్నారు. ముఖ్యంగా..అనుష్క మూడేళ్ల తర్వాత కమ్ బ్యాక్ చేస్తుండటంతో ఈ సినిమాపై చాలా ఆశలున్నాయి. ఈ మూవీ తర్వాత మళ్లీ జేజమ్మ జోరు కొనసాగుతుందా అనే డిస్కషన్ జరుగుతోంది..
అనుష్క లేటెస్ట్ మూవీ ‘మిస్ శెట్టి మిస్టర్ పొలిశెట్టి’ సినిమా సెప్టెంబర్ 7న రిలీజ్ ఫిక్స్ చేశారు. ప్రస్తుతం ప్రమోషన్స్ లో బిజీగా ఉంది మూవీ యూనిట్. ఇప్పటికే యువి క్రియేషన్స్ భారీ బడ్జెట్ తో తీసిన రాధే శ్యాం ఆశించిన ఫలితాన్ని అందుకోలేదు. ఆ సినిమా తర్వాత యువి క్రియేషన్స్ ఇక సినిమాలు చేయడం కష్టమే అని అనుకున్నారు. ఇలాంటి టైమ్ లో అనుష్కతో తెరకెక్కించిన మూవీ ఇది. ఇప్పటికే విడుదలైన టీజర్ కి సినీ ప్రియుల నుంచి మంచి రియాక్షన్ రావడంతో భారీ ఆశలు పెట్టుకుంది యూవి క్రియేషన్స్. అయితే ఈ మూవీ హిట్టు అందరికన్నా అనుష్కకి చాలా చాలా అవసరం.
‘సూపర్’గా దూసుకొచ్చింది
త్రిష, శ్రియ, నయనతార లాంటివారంతా స్టార్ హీరోయిన్స్ గా వెలుగుతున్న టైమ్ లో 2004లో సూపర్ మూవీతో దూసుకొచ్చింది అనుష్క. అందం, అభినయంతో ఆకట్టుకోవడంతో వరుస ఆఫర్లొచ్చాయి. జక్కన్న విక్రమార్కుడు సినిమాతో క్రేజ్ మరింత పెరిగింది. ఇక అరుంధతి సినిమాతో అనుష్క వెనక్కు తిరిగి చూసుకునే అవసరమే లేకపోయింది.జేజమ్మగా నటవిశ్వరూపం చూపించిన స్వీటీ ఈ సినిమాతో ఉత్తమ నటిగా నంది అవార్డుతో పాటు ఫిల్మ్ ఫేర్, సినీ మా అవార్డ్, సంతోషం అవార్డులను కూడా సొంతం చేసుకుంది. ఆ తర్వాత వేదం సినిమాతో తన నటనలో మరో కోణాన్ని పరిచయం చేసి తిరుగులేని హీరోయిన్ గా నిలదొక్కుకుంది. ఆ తర్వాత పంచాక్ష‌రి, రుద్ర‌మ‌దేవి, భాగ‌మ‌తి, సైజ్ జీరో.. ఇలా వరుస లేడీ ఓరియెంటెండ్ మూవీస్ లో నటించింది.
దేవసేనగా నటవిశ్వరూపం
ఇక అనుష్కని మరో మెట్టు ఎక్కించిన సినిమా బాహుబలి. దేవసేన పాత్రకు అనుష్క ప్రాణంపోసిన తీరుకి ఫిదా కానివారులేరు. బాహుబలి-భళ్లాలదేవ తో సమానమైన క్రేజ్ సంపాదించుకుంది దేవసేన క్యారెక్టర్. అప్పటి వరకూ ఎగసి పడిన అనుష్క కెరీర్ ఆ తర్వాత నుంచి ఒక్కో అడుగు వెనక్కు పడింది. ఆ తర్వాత 2020లో ‘నిశ్సబ్ధం’ సినిమాతో వచ్చింది కానీ ఆ మూవీ సక్సెస్ కాలేదు. మళ్లీ మూడేళ్ల తర్వాత ‘మిస్ శెట్టి మిస్టర్ పొలిశెట్టి’ మూవీతో వస్తోంది.
ఫ్యూచరేంటి!
మంచి కథలొస్తే వరుస సినిమాలు చేసేందుకు సిద్ధమని ఇప్పటికే ప్రకటించింది స్వీటీ. అంటే ఇప్పుడున్న సిట్యుయేషన్స్ లో ‘మిస్ శెట్టి మిస్టర్ పొలిశెట్టి’ హిట్ చాలా అవసరం. ఈ సినిమా హిట్టైతే మళ్లీ అనుష్క వరుస ప్రాజెక్టులతో బిజీ అయ్యే అవకాశం ఉంది. సైజ్ జీరో సినిమా తర్వాత తన లుక్ మారినట్టు స్పష్టంగా తెలుస్తున్నా క్రేజ్ మాత్రం ఇప్పటికీ చెక్కుచెదర్లేదు. మరి ‘మిస్ శెట్టి మిస్టర్ పొలిశెట్టి’ తర్వాత అనుష్క ఎలాంటి పాత్రలు ఎంపిక చేసుకుంటుంది? కెరీర్ మళ్లీ జోరందుకుంటుందా…వెయిట్ అండ్ సీ…
