నందమూరి బాలకృష్ణ (Balakrishna), అనిల్ రావిపూడి (Anil Ravipudi) కాంబినేషన్‌లో వస్తోన్న మూవీ టైటిల్ ఖరారైంది. గత కొద్ది రోజులుగా ప్రచారంలో ఉన్న టైటిల్‌నే ఫిక్స్ చేస్తూ కొత్త పోస్టర్ రిలీజ్ చేశారు.
మరో రెండురోజుల్లో పుట్టినరోజు ఉండగానే అభిమానులకు ముందే ట్రీట్ ఇచ్చారు నందమూరి నటసింహం బాలకృష్ణ. తన 108వ సినిమా టైటిల్‌ను విడుదల చేశారు. గత కొద్ది రోజులుగా ప్రచారంలో ఉన్న ‘భగవంత్ కేసరి’ (Bhagavanth Kesari) అనే టైటిల్‌నే ఖరారు చేస్తూ పోస్టర్ వదిలారు. ‘ఐ డోంట్ కేర్’ అనేది ట్యాగ్ లైన్. ఈ సినిమాలో బాలకృష్ణ పోషించిన పాత్ర పేరే సినిమా టైటిల్‌గా పెట్టారు. ఈ పోస్టర్‌లో బాలకృష్ణ లుక్ చూసి అభిమానులు ఫిదా అయిపోతున్నారు.
లుక్ అదుర్స్
గతంలో ఈ మూవీకి సంబంధించి విడుదలైన రెండు పోస్టర్లు చూసి అభిమానులు ఫిదా అయ్యారు. మునుపెన్నడూ లేని లుక్ లో దర్శకుడు అనిల్ రావిపూడి మలిచాడన్నారు. తాజాగా విడుదలైన లుక్ అంతకు మించి అనేలా ఉంది. బాలయ్య మేనరిజం, ఆయన చేతిలో ఉన్న ఆయుధం కూడా డిఫరెంట్‌గా ఉంది. మోకాలి మీద కూర్చుని శత్రువులపై దాడికి సిద్ధంగా ఉన్న సింహంలా బాలయ్య కనిపిస్తున్నారు. ఈ పోస్టర్‌ను ట్వీట్ చేసిన చిత్ర నిర్మాణ సంస్థ షైన్ స్క్రీన్స్.. ‘అన్న దిగిండు, ఇగ మాస్ ఊచకోత షురూ’ అని క్యాప్షన్ పెట్టింది. మరోవైపు, ఇదే పోస్టర్‌ను దర్శకుడు అనిల్ రావిపూడి ట్వీట్ చేస్తూ.. ‘గిప్పడి సంది ఖేల్ అలగ్’ అని రాసుకొచ్చారు. ఈ సినిమాలో బాలకృష్ణ తెలంగాణ యాసలో మాట్లాడతారని ఇప్పటికే ప్రకటించారు. ఇప్పుడు తాజా పోస్టులతో…బాలయ్య తెలంగాణ యాసలో చెప్పే డైలాగులకు థియేటర్లు మారుమోగడం ఖాయంగా కనిపిస్తోంది.
జూన్ 10న టీజర్
బాలకృష్ణ పుట్టినరోజు సందర్భంగా జూన్ 10న టీజర్ విడుదలయ్యే అవకాశం ఉంది. ‘భగవంత్ కేసరి’లో బాలకృష్ణకు జోడీగా కాజల్ అగర్వాల్ నటిస్తోంది. గతంలో ఈ కాంబినేషన్ పై చాలాసార్లు వార్తలొచ్చినా ఫైనల్ కాలేదు..దీంతో ఈ మూవీలో తొలిసారిగా బాలయ్యతో జోడీ కడుతోంది కాజల్. బాలకృష్ణకు వరుసకు కుమార్తె అయ్యే పాత్రలో శ్రీలీల నటిస్తోంది. బాలకృష్ణ సోదరుడిగా శరత్ కుమార్ కి శ్రీలీల కూతురు. ఇందులో బాలీవుడ్ నటుడు అర్జున్ రాంపాల్ విలన్ .
దసరాకి మూవీ విడుదల
దసరాకి ఈ సినిమా థియేటర్లలో విడుదల కానుంది.విడుదలకు ఆరు నెలల ముందు సినిమా ఓటీటీ రైట్స్ భారీ రేటుకు అమ్మేశారని సమాచారం. ప్రముఖ ఓటీటీ వేదిక అమెజాన్ ప్రైమ్ వీడియో రూ. 36 కోట్లకు ఆల్ లాంగ్వేజెస్ రైట్స్ తీసుకుందట. ఈ చిత్రాన్ని షైన్ స్క్రీన్స్ పతాకంపై హరీష్ పెద్ది, సాహు గారపాటి నిర్మిస్తున్నారు. తమన్ సంగీత దర్శకుడు.
