పాన్ ఇండియా హీరో ప్రభాస్ నటించిన ‘ఆదిపురుష్’ సినిమా జూన్ 16న విడుదలవుతోంది. తాజాగా మూవీ టీమ్ టికెట్ల విక్రయ విషయంలో ఓ కీలక నిర్ణయం తీసుకుంది. ప్రతి థియేటర్లో ఆంజనేయుడికి ఓ సీటు ఉంచాలని డిసైడ్ అయింది. ఎందుకిలా చేస్తోందో తెలుసా…
యత్ర యత్ర రఘునాథ కీర్తనం – తత్ర తత్ర కృత మస్తకాంజలిం
బాష్ప వారి పరిపూర్ణ లోచనం – మారుతిం నమత రాక్షసాంతకం
‘శ్రీరాముడి కీర్తనం ఎక్కడ వీనులవిందుగా వినిపిస్తుందో.. అక్కడ తలవంచి, జోడించిన చేతులు తలమీద ఉంచి, ఆనందబాష్పాలు చిందిస్తూ ఉండే, రాక్షసాంతకుడైన మారుతికి నమస్కరిస్తున్నాను’ అని దీని భావం. ఎక్కడ రామనామం వినిపిస్తుందో అక్కడ హనుమంతుడు చేతులు జోడించి కూర్చుంటాడని పండితులు చెబుతారు. రామనామ సంకీర్తనం జరిగే చోట అందరికన్నా ముందు వచ్చి అందరూ వెళ్లిపోయేవరకూ ఓ మూలన కూర్చుని ఉంటాడట ఆంజనేయడు.
జూన్ 16న ఆదిపురుష్ విడుదల
బాలీవుడ్ దర్శకుడు ఓం రౌత్ దర్శకత్వంలో తెరకెక్కిన మైథాలజికల్ మూవీ ‘ఆదిపురుష్’ లో శ్రీరాముడిగా ప్రభాస్, సీతగా కృతి సనన్ రావణుడిగా సైఫ్ అలీ ఖాన్ నటించారు. సుమారు రూ.550 కోట్లకు పైగా భారీ బడ్జెట్ తో పాన్ ఇండియా స్థాయిలో నిర్మితమైన ఈ సినిమా అన్ని కార్యక్రమాలను పూర్తిచేసుకుని జూన్ 16న ప్రేక్షకుల ముందుకు రాబోతోంది.
థియటర్లో ఆంజనేయుడికి ఓ సీటు
తాజాగా టికెట్ల విక్రయ విషయంలో ఆదిపురుష్ చిత్ర బృందం ఓ కీలక నిర్ణయం తీసుకుంది. ఈ సినిమా ప్రదర్శించే ప్రతి థియేటర్లో ఒక సీటును విక్రయించకుండా హనుమంతుడి కోసం ప్రత్యేకంగా కేటాయిస్తున్నట్లు ప్రకటించింది. “రామాయణ పారాయణం జరిగే ప్రతి చోటకి హనుమంతుడు విచ్చేస్తాడు అనేది మన నమ్మకం. ఈ నమ్మకానికి గౌరవిస్తూ ప్రభాస్ రాముడిగా నటించిన ‘ఆదిపురుష్’ సినిమాని ప్రదర్శించే ప్రతి థియేటర్లో ఒక సీటు విక్రయించకుండా హనుమంతుడి కోసం ప్రత్యేకంగా కేటాయించడం జరుగుతుంది. ఎంతో ప్రతిష్టాత్మకంగా అత్యంత భారీ హంగులతో నిర్మించిన ‘ఆదిపురుష్’ ని హనుమంతుడి సమక్షంలో అందరం తప్పక వీక్షిద్దాం” అంటూ చిత్ర యూనిట్ ప్రకటించింది.
ప్రీ రిలీజ్ ఈవెంట్ కి అతిథిగా చిన్న జీయర్
కని విని ఎరుగని రీతిలో కోట్ల రూపాయలు ఖర్చు చేసి నిర్మాతలు తిరుపతిలో ఆదిపురుష్ ఫ్రీ రిలీజ్ వేడుకను నిర్వహిస్తున్నారు. ఈ ఫ్రీ రిలీజ్ వేడుకకు ముఖ్య అతిథిగా ప్రముఖ ఆధ్యాత్మిక వేత్త చిన్న జీయర్ స్వామి హాజరుకానున్నారు. ఈ ఫ్రీ రిలీజ్ ఈవెంట్లో సినిమా చరిత్రలోనే మొదటిసారి 50 అడుగుల ప్రభాస్ హాలో గ్రామ్ సైతం ప్రదర్శించబోతున్నారు. టాలీవుడ్ డైరెక్టర్ ప్రశాంత్ వర్మ పర్యవేక్షణలో ఈ ప్రీ రిలీజ్ ఈవెంట్ జరగనుంది. ఇప్పటికే ఈ సినిమా నుంచి విడుదలైన ట్రైలర్, సాంగ్స్ కి ఆడియన్స్ నుంచి అద్భుతమైన రెస్పాన్స్ వచ్చింది. ప్రీ రిలీజ్ ఈవెంట్ లో కూడా ఆదిపురుష్ నుంచి మరో ట్రైలర్ ని కూడా విడుదల చేయనున్నట్లు తెలుస్తోంది. భారీ అంచనాల మధ్య విడుదలవుతోన్న ‘ఆదిపురుష్’ ఎలాంటి టాక్ సొంతం చేసుకుంటుందో చూడాలి..
