వరుస సినిమాల్లో నటిస్తోన్నప్పటికీ ఇప్పటికీ అఖిల్ కు సరైన హిట్టు లేదు. స్టార్ హీరోగా ఎదిగే లక్షణాలు పుష్కలంగా ఉన్నా ఆ దిశగా ఒక్క అడుగు కూడా పడలేదు. ఈ మధ్య భారీ అంచనాల నడుమ విడుదలైన ‘ఏజెంట్’ డిజాస్టర్ గా మిగిలింది. ఈ సినిమాతో మరో లెవెల్ కు వెళతాడు అనుకుంటే మరికొంత అగాథంలోకి కూరుకుపోయాడు. అందుకే తర్వాత చేయబోయే ‘ధీర’ సినిమాతో సక్సెస్ అందుకోవాలనే గట్టి పట్టుదలతో ఉన్నాడు అఖిల్. యూవీ క్రియేషన్స్ బ్యానర్ పై తెరకెక్కుతోన్న ‘ధీర’ సినిమాకి రామ్ చరణ్ కూడా పెట్టుబడి పెడుతున్నాడు. ఈ సినిమా ద్వారా అనిల్ కుమార్ అనే నూతన దర్శకుడు ఇండస్ట్రీ కి పరిచయం అవుతున్నాడు. గతంలో ప్రభాస్ హీరో గా నటించిన సాహో, రాధే శ్యామ్ చిత్రాలకు అసోసియేట్ డైరెక్టర్ గా పనిచేసాడు అనిల్. తాజాగా ఈ మూవీకి సంబంధించి క్రేజీ రూమర్ వైరల్ అవుతోంది.
అఖిల్ తో సమంత
అఖిల్ లేటెస్ట్ మూవీ ధీరలో సమంత నటించబోతోందనే ప్రచారం జరుగుతోంది. టాలీవుడ్ ఇండస్ట్రీలో సమంత లక్కీ గాళ్ గా పేరు సంపాదించుకుంది. సామ్ ఉంటే సినిమా హిట్టనే సెంటిమెంట్ ఇప్పటికీ చాలా మందిలో ఉంది. రీసెంట్ గా వచ్చిన సినిమాలు నిరాశపర్చినా గతంలో సమంత నటించిన సినిమాలు దాదాపు బ్లాక్ బస్టర్ హిట్టే. అందుకే అదే సెంటిమెంట్ తో మాజీ వదినను సంప్రదించాడట అఖిల్. నాగచైతన్యతో వివాహ బంధానికి ముగింపు పలికినప్పటికీ అఖిల్ తో టచ్ లోనే ఉంటోంది సమంత. అందుకే అఖిల్ అడగగానే ఒప్పుకున్నట్టు తెలుస్తోంది. అయితే ఇందులో ఆమె హీరోయిన్ గా నటిస్తుందా, లేదా ఏమైనా ముఖ్య పాత్ర పోషిస్తుందా అనేది చూడాలి.
టాలీవుడ్, బాలీవుడ్ టు హాలీవుడ్
ఇండస్ట్రీలో అడుగుపెట్టినప్పటి నుంచీ వరుస హిట్స్ తో స్టార్ హీరోయిన్ హోదా అనుభవించిన సమంత..చైతూతో విడాకుల తర్వాత పెద్దగా సక్సెస్ అందుకోలేకపోయిందనే చెప్పాలి. యశోద, శాకుంతలం సినిమాలు ఆశించిన స్థాయిలో హిట్టవలేదు. తెలుగులో విజయ్‌దేవరకొండతో కలిసి నటించిన ‘ఖుషి’ సెప్టెంబర్‌ 1న ప్రేక్షకుల ముందుకురానుంది. ‘ఫ్యామిలీమెన్‌-2’ వెబ్‌ సిరీస్‌తో హిందీలో కూడా ఆదరణ సొంతం చేసుకున్న సమంత ప్రస్తుతం ‘సిటాడెల్‌’ సిరీస్‌ హిందీ రీమేక్‌లో నటిస్తోంది. తాజా సమాచారం ప్రకారం సమంత హాలీవుడ్‌లోకి ఎంట్రీ ఇవ్వనుందని టాక్. ‘చెన్నై స్టోరీ’ అనే హాలీవుడ్ చిత్రంలో ఆమె నటించనుందని టాక్. ఇంగ్లాండ్‌కు చెందిన యువకుడికి, చెన్నై అమ్మాయికి మధ్య నడిచే ప్రేమకథే ఈ మూవీ అని తెలుస్తోంది. అంటే ఒకేసారి టాలీవుడ్, బాలీవుడ్ తో పాటూ హాలీవుడ్ లోనూ సినిమాలు చేస్తోంది. అయితే… గతంలోను నాగ చైతన్య, సమంత కలిసి నందిని రెడ్డితో ఓ సినిమా చేస్తున్నారనే గాసిప్ వచ్చింది. ఇక ఇప్పుడు అఖిల్‌తో సమంత సినిమా అంటున్నారు. ఇందులో నిజమెంతో తెలియాలంటే అఫీషియల్ అనౌన్స్ మెంట్ రావాలి మరి.
