తెలంగాణ సీఎం కేసీఆర్ భారత్ రాష్ట్ర సమితి పేరుతో ఆంధ్రప్రదేశ్ రాజకీయాల్లో అడుగుపెడితే అడ్డుకుంటామని భారతీయ జనతా పార్టీ రాష్ట్ర అధ్యక్షుడు సోము వీర్రాజు హెచ్చరించారు. గన్నవరం వేదికగా ప్రజాపోరు ప్రారంభం చేద్దామంటూ పార్టీ శ్రేణులకు పిలుపునిచ్చారు. భారతీయ జనతా పార్టీ రాష్ట్ర కార్యవర్గ సమావేశం గన్నవరంలో జరిగింది. ఈ సందర్బంగా పార్టీ రాష్ట్ర అధ్యక్షుడు సోము వీర్రాజు రాష్ట్రంలో అధికారంలో ఉన్న వైఎస్ఆర్ కాంగ్రెస్ ప్రభుత్వాన్ని దిగ్బంధం చేసే విధంగా జిల్లా స్థాయిలో కూడా ఛార్జిషీట్ దాఖలు చేస్తామన్నారు. రైతులకు భీమా సౌకర్యం లేకుండా నట్టేట ముంచిన వైఎస్ఆర్ కాంగ్రెస్ పార్టీ ప్రభుత్వానికి బుద్ధి చెప్పేందుకు రైతులు సిద్ధంగా ఉన్నారని ఆయన హెచ్చరించారు. రైతులకు చిల్లులు పడిన గోనె సంచులు ఇవ్వడంలో ప్రభుత్వం మాఫియాను నడుపుతోందని విమర్శించారు. రైతులకు గిట్టుబాటు ధర లేకుండా చేస్తున్న రాష్ట్ర ప్రభుత్వం వైఫల్యాలను ఛార్జ్ షీట్ లో పొందుపరుస్తున్నట్లు సోము వీర్రాజు వెల్లడించారు.
వేల కోట్ల కేంద్ర నిధుల దారి మళ్లింపు
పేదల ఇళ్ల కోసం భూములను కొనుగోలు చేయడంలోనూ రూ. వేల కోట్ల అవినీతి జరిగిందని.. వైసీపీ భాగోతాన్ని బట్టబయలు చేస్తామని ఏపీ బీజేపీ అధ్యక్షుడు సోము వీర్రాజు అన్నారు. ఈ రోజు గన్నవరంలో పార్టీ కార్యవర్గ సమావేశంలో అధికార పార్టీ వైసీపీపై సంచలన వ్యాఖ్యలు చేశాడు. వైసీపీ అధికారంలోకి వచ్చిన సమయంలో కేంద్ర ప్రభుత్వం నుండి వచ్చిన నిధులను దారి మళ్లించారు. అందులోనూ పేదల ఇళ్ల కోసం కేంద్రం ప్రవేశ పెట్టిన పీఎం ఆవాస యోజన పధకాన్ని మార్చుకుని మరీ నిధులను స్వాహా చేశారని విమర్శించారు. ఇది తాము ఎప్పటి నుండో చెబుతూనే ఉన్నాము, వైసీపీ ప్రభుత్వంలో ఆలా జరగకపోతే వివరాలను బయటపెట్టాలని సోము వీర్రాజు ఛాలెంజ్ విసిరారు. ఇవన్నీ ఎవరికీ తెలియవు అనుకోకండి… వెంటనే ప్రజలకు కేటాయించిన టిడ్కొ ఇళ్లను లబ్దిదారులకు పంపిణీ చేయాలని ఏపీ ప్రజల తరపున వైసీపీని డిమాండ్ చేశారు.
రేషన్ బియ్యంలో వేయి కోట్ల స్కాం
రాష్ట్రంలో రేషన్ మాఫియా రేషన్ బియ్యం రీసైకిల్ చేసి వెయ్యి కోట్లు కుంభకోణం జరుగుతోందని బీజేపీ రాష్ట్ర అధ్యక్షుడు సోము వీర్రాజు ఆరోపించారు. ఈ మాఫియాలో అధికార పార్టీకి చెందిన నేతలు కీలకంగా వ్యవహరిస్తున్నారని కీలక వ్యాఖ్యలు చేశారు. ఇందుకు సంబంధించిన ఆధారాలు సేకరించామని అన్నారు. రైతు భరోసా కేంద్రాలు రైతు దోపిడీ కేంద్రాలుగా మారాయని ఎద్దేవా చేశారు. జాతీయ రహదారుల కనెక్టివిటికి కేంద్ర ప్రభుత్వం కాంట్రాక్టు ఇస్తే, ఆంధ్రప్రదేశ్ లో ఆయా కాంట్రాక్ట్ పనులను మంత్రి అనుచరులకు కట్టబెడుతున్నారని ఆయన ఆగ్రహం వ్యక్తం చేశారు. కాంట్రాక్టుల కోసం అధికారులుపై ఒత్తిడి తీసుకువచ్చి, అవినీతి అక్రమాలకు కేంద్రంగా మంత్రులు మారుతున్నారని, అన్నీ తెలిసినప్పటికి అధికారులు సైలెంట్ అయిపోవాల్సిన పరిస్థితులు ఏపీలో నెలకొన్నాయని సోము వీర్రాజు వ్యాఖ్యానించారు.
మద్యం దుకాణాల్లో కలెక్షన్ నగదు అంతా ఎక్కడికి వెళ్తోంది ?
రాష్ట్ర ప్రభుత్వానికి మద్యం అమ్మకాల మీదనే ఎక్కువ ధ్యాస ఉందని సోము వీర్రాజు ఫైర్ అయ్యారు. కేంద్ర ప్రభుత్వం ప్రతిష్టాత్మకంగా చేపట్టిన ఆయుష్ పై రాష్ట్ర ప్రభుత్వానికి అసలు అవగాహన లేదని అన్నారు. బ్రాందీ మీద ఉన్న అవగాహన ఆయుష్ పై ముఖ్యమంత్రి జగన్ కి లేదన్నారు. సాంప్రదాయ వైద్య విధానం పై రాష్ట్ర ప్రభుత్వం సమీక్షలు చేయడం లేదన్నారు. జగన్ బ్రాందీ షాపు ల్లో అంతా క్యాష్ ని వినియోగిస్తున్నారని, ఆ నగదు అంతా ఎక్కడికి వెళుతుందని సోము వీర్రాజు ప్రశ్నించారు. వైఎస్ఆర్ కాంగ్రెస్ ప్రభుత్వానికి 22 లక్షల ఇళ్ళు కేంద్రం ప్రభుత్వం ఇస్తే 7 లక్షలు నిర్మాణం చేశామని చెపుతున్నారని, ఎంత మందికి ఇళ్ళను కేటాయించారో చెప్పగలరా అని ప్రశ్నించారు. ఇళ్ల స్థలాలు కొనుగోలులో వైసీపీ నేతలు, ఎమ్మెల్యేలు వందల కోట్ల రూపాయలు అవినీతికి పాల్పడ్డారని ఆరోపించారు. ఇంత దారుణమైన ఘటనలు రాష్ట్ర వ్యాప్తంగా నిత్యకృత్యం అయ్యాయని, టిడ్కో ఇళ్లు వెంటనే మంజూరు చేయాలని డిమాండ్ చేశారు.
మే30 నుండి జూన్ 30 వరకు ప్రతి ఇంటి కి మోదీ పాలన విజయాలు
బీజేపీ అనుబంధ సంఘాలు ఛార్జిషీట్ దాఖలు చేస్తాయని, ఎమ్మెల్యేలను టార్గెట్ చేసి ఛార్జిషీట్ లు దాఖలు చేసినట్లు తెలిపారు. బీజేపీ నేతలపై నెల్లూరు జిల్లా కావలిలో పోలీసులు దాష్టికాన్ని రాష్ట్ర గవర్నర్ కి ఫిర్యాదు చేశామని చెప్పారు. అవినీతి అంతం కావాలంటే నరేంద్ర మోడీ ప్రభుత్వం రాష్ట్రంలో రావాలని బీజేపీ నేత సోము వీర్రాజు అన్నారు. ఇళ్ళు కట్టలేని దద్దమ్మ ప్రభుత్వం ఇక్కడ ఉందని, జిల్లా, రాష్ట్ర స్థాయి ఛార్జిషీట్ దాఖలు చేస్తామని, నరేంద్ర మోడీ పరిపాలన మే30 నుండి జూన్ 30 వరకు ప్రతి ఇంటి కి తీసుకొని వెళ్తామన్నారు. దశాబ్ద కాలంలో కాంగ్రెస్ వేల కోట్ల అవినీతి కి పాల్పడిందని ఆరోపించారు. కానీ బీజేపీ పాలనలో అవినీతికి చోటు లేదన్నారు.
