జనసేన ప్రధాన కార్యదర్శి నాగేంద్రబాబు గత వారం సోషల్ మీడియాలో ఓ పోస్ట్ పెట్టారు. అదేమిటంటే మన వేలితో మన కన్నె పొడుస్తారు అన్న పోస్ట్. ఓ ఫోటో పెట్టారు. దానికి క్యాప్షన్ పెట్టారు. అప్పట్నుంచి అసలు జనసేనలో ఏదో జరుగుతోందన్న అభిప్రాయం బలంగా వినిపిస్తోంది. అసలు నాగబాబు ఏదో సందర్భం లేకుండా ఆ పోస్టు పెట్టరని.. అంతర్గతంగా జరుగుతున్న ఏదో విషయానికి సంబంధించి అలాంటి పోస్టు పెట్టారన్న చర్చలు ఆ పార్టీలోనూ సాగుతున్నాయి. అసలు జనసేనలో ఏం జరుగుతోందా అన్న సందేహం కూడా సైనికుల్లో పెరిగిపోయింది.
ఆ పోస్టు నాదెండ్ల మనోహర్‌ను ఉద్దేశించేనా ?
నాగబాబుకు ఇటీవల పవన్ కల్యాణ్ ప్రధాన కార్యదర్శి పదవి ఇచ్చారు. ఇప్పటి వరకూ ఆయనకు ఇవ్వాలన్న ఆలోచన రాలేదు. కానీ హఠాత్తుగా ఇచ్చారు. దాదాపుగా పార్టీ మొత్తం ఆయన చేతుల్లోకి వెళ్లేలా నిర్ణయాలు తీసుకున్నారు. నాగబాబు ప్రధాన కార్యదర్శి అయిన వెంటనే.. అన్ని జిల్లా పార్టీ క్యాడర్ తో పాటు అన్ని వ్యవహారాల తన గుప్పిట్లోకి వచ్చేలా తెచ్చుకున్నారు. వీడియో కాన్ఫరెన్స్ లు నిర్వహించారు. వీలైనంత మందిని హైదరాబాద్‌కు పిలిపించి మాట్లాడారు. దీంతో అసలేం జరుగుతోందన్న అనుమానం చాలా మందిలో ఉంది. నాదెండ్ల విషయంలో పవన్ కల్యాణ్ నమ్మకం కోల్పోయారని అందుకే ఇలా నాగబాబును యాక్టివ్ చేశారని అంటున్నారు.
నాదెండ్ల చివరి క్షణంలో దెబ్బ కొడతారని భయపడ్డారా ?
ఇప్పటి వరకూ నాదెండ్ల మనోహర్ జనసేన తరపున జిల్లాల్లో పర్యటించేవారు. ఓ రకంగా పార్టీ క్యాడర్ మొత్తం ఆయనకు తెలుసు. జిల్లా కార్యవర్గాలు ఆయన నియమించినవే. పార్టీపై గ్రిప్ ను నాదెండ్ల పెంచుకున్నారు. ఎన్నికలకు ముందు ఆయన .. ఝులక్ ఇస్తారనే అనుమానాలు బలపడటం.. దానికి సంబంధించిన సూచనలు కనిపించండతో పవన్ అప్రమత్తమయ్యారని అంటున్నారు. నాగబాబు యాక్టివ్ అయిన తర్వాత నాదెండ్ల జోరు తగ్గింది. పెద్దగాఎక్కడా కనిపించడం లేదు. నాగబాబు జిల్లాల పర్యటనలకు కూడా వెళ్తున్నారు. ఆదివారం అనకాపల్లిలో పర్యటించారు. ఇక వరుసగా జిల్లాలు తిరిగి.. పార్టీ కార్యాలయాలను ప్రారంభించాలనుకుంటున్నారు.
జనసేనానికి తీరిక లేని షెడ్యూల్స్ !
జనసేన ప్రధాన కార్యదర్శిగా నియమితులైన నాగబాబు రంగంలోకి దిగేశారు. గతంలోలా పవన్ కల్యాణ్.. పార్టీ మీద పూర్తి స్థాయిలో దృష్టి సారించలేకపోతున్నారు. గతంలో వారాంతాల్లో అయినా ఏపీలో పర్యటించేవారు. ఇటీవలి కాలంలో అది కూడా లేదు. ఆ లోటును పూడ్చడానికి ఎక్కువగా నాగబాబు జిల్లాల్లో పర్యటించాలని అనుకుంటున్నట్లుగా కనిపిస్తోంది. వచ్చే ఎన్నికల్లో తాను పోటీ చేయనని నాగబాబు చాలా సార్లు చెప్పారు. ఇప్పుడు మనసు మార్చుకుంటారోమో తెలియదు కానీ.. ఎంపిక చేసిన నియోజవర్గాల్లో ఆయన పర్యటనలు ప్రత్యేకంగా ఉండే అవకాశం ఉంది. నాదెండ్ల పర్యటనలు తగ్గి… నాగబాబు పర్యటనను పెరగనున్నాయి. అంటే.. జనసేనలో నెంబర్ 2 మారినట్లేనని ఎక్కువ మంది భావిస్తున్నారు. ఏం జరుగుతుందో ముందు ముందు చూడాల్సి ఉంది.
