యంగ్ రెబల్ స్టార్ ప్రభాస్ హీరోగా ఓం రౌత్ దర్శకత్వంలో తెరకెక్కిన ‘ఆదిపురుష్’ సినిమా జూన్ 16న విడుదలకు సిద్ధమైంది. విజువల్ గ్రాండియర్ గా సిల్వర్ స్క్రీన్ పై మోషన్ క్యాప్చర్ టెక్నాలజీతో ఈ చిత్రాన్ని ఆవిష్కరించారు. సినిమాలో ఉన్న లోకేషన్స్ అన్ని కూడా గ్రాఫిక్స్ లోనే షూట్ చేశారు. రామాయణం కథ ఆధారంగా తెరకెక్కిన ఈసినిమాలో శ్రీరాముడిగా ప్రభాస్ , సీతగా కృతి సనన్ నటిస్తున్నారు. ఈసినిమాకు సంబందించిన ప్రమోషన్స్ ఇప్పటికే ప్రారంభమయ్యాయి. త్వరలో ప్రభాస్ కూడా ప్రమోషన్స్ లో పాల్గొననున్నాడు..తాజా అప్ డేట్ ఏంటంటే మే 9న ఆదిపురుష్ ట్రైలర్ ని చాలా గ్రాండ్ గా లాంచ్ చేయడానికి సన్నాహాలు చేస్తున్నారు.
ట్రైలర్ రిలీజ్ లో ట్రెండ్ సెట్ చేస్తున్నారు
‘ఆదిపురుష్’ ట్రైలర్ ను మే 9న గ్రాండ్ గా రిలీజ్ చేయబోతున్నట్లు చిత్ర బృందం సోషల్ మీడియా వేదికగా ప్రకటించింది. ఈ సందర్భంగా ఆకాశంలోకి విల్లు ఎక్కు పెట్టిన ప్రభాస్ పోస్టర్ ను షేర్ చేశారు. ఈ ట్రైలర్ ను గ్లోబల్ వైడ్ గా లాంచ్ చేయబోతున్నారు. మన దేశంలోనే కాకుండా ప్రపంచ వ్యాప్తంగా 70 దేశాలలో అత్యధిక స్క్రీన్స్ లో ఈ ట్రైలర్ ను విడుదల చేయబోతున్నట్టు ప్రకటించింది మూవీ యూనిట్. భారతదేశంతో పాటు యూఎస్ఏ, యుకే, కెనడా, మిడిల్ ఈస్ట్, ఆస్ట్రేలియా, న్యూజిలాండ్, సింగపూర్, ఇండోనేషియా, థాయ్ లాండ్, మలేషియా, హాంకాంగ్, ఫిలిప్పీన్స్, మయన్మార్, శ్రీలంక, జపాన్, రష్యా సహా ఆసియా మరియు దక్షిణాసియాలోని పలు దేశాలలో ‘ఆదిపురుష్’ ట్రైలర్ ను 3డీ లాంచ్ చేయనున్నట్లుగా తెలుస్తోంది.
ట్రోలింగ్ కి చెక్ పెట్టిన ‘ఆదిపురుష్’ టీమ్
వాస్తవానికి ‘ఆదిపురుష్’ సినిమాకు సంబంధించి గతేడాది వచ్చిన ప్రతీ ప్రమోషనల్ కంటెంట్ పై సోషల్ మీడియాలో పెద్ద ఎత్తున ట్రోలింగ్ నడిచింది. టీజర్ లో వీఎఫ్ఎక్స్ వర్క్స్ నాసిరకంగా ఉన్నాయని, గ్రాఫిక్స్ చూస్తుంటే ఒక కార్టూన్ మూవీ చూస్తున్నట్లు వుందని, ఇతిహాసాలను అపహాస్యం చేస్తున్నారని విమర్శించారు. దీంతో సంక్రాంతికి రిలీజ్ చేయాల్సిన చిత్రాన్ని వాయిదా వేసి మరీ రీ-వర్క్ చేశారు. దీనికి తగ్గట్టుగానే ఈ మధ్య విడుదల చేసిన ఆది పురుష్ పోస్టర్స్ ఆడియెన్స్ నుంచి మంచి రెస్పాన్స్ తెచ్చుకుని, సినిమాపై పాజిటివ్ బజ్ క్రియేట్ చేశాయి. రాబోయే ట్రైలర్ కూడా అంతకుమించి ఉంటుందనే అంచనాలు క్రియేట్ చేశారు. ఇప్పటికే మధ్యప్రదేశ్ ముఖ్యమంత్రి శివరాజ్ సింగ్ ఛౌహాన్ సహా పలువురు నేతలు ఈ ట్రైలర్ ను చూసి పాజిటివ్ గా స్పందించారు. తాజాగా ట్రైలర్ లాంచ్ డేట్ కన్ఫర్మ్ చేస్తూ మరో కొత్త పోస్టర్ ని చిత్ర యూనిట్ రిలీజ్ చేసింది.
జూన్ 16న విడుదల
న్యూయార్క్ లోని ట్రిబెకా ఫెస్టివల్ లో అంతర్జాతీయ ప్రీమియర్ కు సెలెక్ట్ కావడం ద్వారా ప్రపంచవ్యాప్తంగా అందరి దృష్టిని ఆకర్షించింది ‘ఆదిపురుష్’ సినిమా. ఇందులో భాగంగా 3:22 నిమిషాల నిడివితో ఈ మాగ్నమ్ ఓపస్ ట్రైలర్ ను గ్లోబల్ వైడ్ లాంచ్ చేయడానికి ప్లాన్ చేస్తున్నట్లు టాక్ వినిపిస్తోంది. టి సిరీస్ భూషణ్ కుమార్ సమర్పణలో క్రిష్ణకుమార్, ఓమ్ రౌత్, ప్రసాద్ సుతారియా, రెట్రోఫిల్స్ రాజేష్ నాయర్ భారీ బడ్జెట్ తో ప్రతిష్టాత్మకంగా ఈ చిత్రాన్ని నిర్మిస్తున్నారు. తెలుగులో యూవీ క్రియేషన్స్ బ్యానర్ లో వంశీ, ప్రమోద్ లు రిలీజ్ చేస్తున్నారు. 2023 జూన్ 16న హిందీ, తెలుగు, తమిళం, మలయాళం, కన్నడ భాషల్లో IMAX & 3D ఫార్మాట్లలో ‘ఆదిపురుష్’ సినిమా విడుదల కాబోతోంది.
