కర్ణాటక ఎన్నికల్లో ఏపీ భారతీయ జనతా పార్టీ కీలక పాత్ర పోషిస్తోంది. ముఖ్యంగా యువనేతలు విస్తృతంగా పర్యటిస్తున్నారు. ఏపీ బీజేపీలో కీలకంగా ఉండే విష్ణువర్దన్ రెడ్డి కర్ణాటక ఎన్నికల ప్రచారంలో ప్రత్యేక బాధ్యతలు నిర్వహిస్తున్నారు. ఆయన గత రెండు, మూడు వారాల నుంచి కర్ణాటకలోనే ఉంటున్నారు. కేంద్ర పార్టీనాయకులు ఆయన చురుకుదనాన్ని చూసి ప్రధాని సభల ఏర్పాట్లలో కూడా భాగం చేశారు.
ప్రధాని సభల ఏర్పాట్లలో కీలకంగా విష్ణువర్దన్ రెడ్డి
కర్ణాటకలో అధికారాన్ని నిలబెట్టుకోవాలని భారతీయ జనతా పార్టీ లక్ష్యంగా పెట్టుకుంది. ప్రధాని మోదీ కూడా ప్రత్యేక శ్రద్ధ తీసుకుంటున్నారు. అందుకే ఆయన వరుసగా కర్ణాటకలో ప్రచారం చేస్తున్నారు. ఈ క్రమంలో రెండు రోజుల పాటు జరిగిన విస్తృత పర్యటనలకు.. భారీ ఏర్పాట్లు చేశారు. ఆయన సభల ఏర్పాట్లలో కీలక బాధ్యతలను యువనేతలకే ఇచ్చారు. ఏపీ బీజేపీ ప్రధాన కార్యదర్శి విష్ణువర్ధన్ రెడ్డి తన బాధ్యతల విషయంలో శ్రమ లేకుండా కృషి చేస్తారు. అందుకే ఆయనకు ప్రత్యేక గుర్తింపు లభించింది. ప్రధాని మోదీ కూడా ఆయనతో ఓ నిమిషం మాట్లాడారు.
తెలుగు ఓటర్లు ఉన్న నియోజకవర్గాల్లో విస్తృత ప్రచారం !
కర్ణాటకలో తెలుగు ఓటర్లు కీలకం. తెలుగు ఓటర్లు ఎక్కువగా ఉన్న నియోజకవర్గాల్లో విష్ణువర్ధన్ రెడ్డి విస్తృత ప్రచారం చేస్తున్నారు. కోలారు. గౌరిబిదనూరు, చిక్ బళ్లాపూర్, బాగేపల్లి వంటి చోట్ల వ్యూహాత్మకంగా విష్ణువర్ధన్ రెడ్డి ప్రచారం చేశారు. అక్కడి కమ్యూనిటి సమావేశాలు పెట్టి.. మళ్లీ బీజేపీ రావాల్సిన అవశ్యకతను వివరిస్తున్నారు. రాజకీయ వ్యూహాలు అమలు చేయడంలో విష్ణువర్ధన్ రెడ్డి చురుకుదనం గమనించిన కర్ణాటక ముఖ్య నేతలు ఇతర నియోజకవర్గాలకూ ఆయనను పంపుతున్నారు. దీంతో విష్ణువర్దన్ రెడ్డి తీరిక లేకుండా తిరుగుతున్నారు. బీజేపీ రెండో సారి అధికారంలోకి రావడానికి తన వంతు ప్రయత్నం చేస్తున్నారు.
కేంద్ర పార్టీ పెద్దల ప్రశంసలు !
ఏపీ బీజేపీలో విస్తృతంగా పర్యటించే నేత విష్ణువర్దన్ రెడ్డి. ఆయన పార్టీ కోసం ఆ మూల నుంచి ఈ మూల వరకూ ఎప్పుడూ తిరుగుతూనే ఉంటారు. పార్టీకి అవసరం అయితే ఎలాంటి కీలక బాధ్యలు అయినా నిర్వహించేందుకు వెనుకాడరు. ఆయన సేవల్ని పార్టీ హైకమాండ్ పెద్దలు కూడా ఎప్పటికప్పుడు గుర్తిస్తూ ఉంటారు. ప్రధాని మోదీ కర్ణాటక ఎన్నకిల ప్రచారం సమయంలో ఎంత బిజీగా ఉన్నా… ఒక నిమిషం విష్ణుతో మాట్లాడారు.
