మెగాస్టార్ పై తొడకొడుతున్న డీజే టిల్లు

డీజే టిల్లు సినిమాతో ఒక్కసారిగా రాత్రికి రాత్రి పాపులర్ అయ్యాడు సిద్ధు జొన్నలగడ్డ. అంతకు ముందు గుంటూరు టాకీస్ లో నటించినా కూడా పెద్దగా పేరు రాలేదు సిద్ధూకి. దీంతో… కొన్నాళ్లు గ్యాప్ తీసుకుని… ఓన్ రైటింగ్ తో డీజే టిల్లుగా బయటకు వచ్చాడు. సినిమా సూపర్ హిట్ అయ్యింది. నటుడిగానే కాకుండా రచయితగా కూడా డీజే టిల్లూతో మంచి పేరు తెచ్చుకున్నాడు సిద్ధు. ఇప్పుడు పార్ట్ 2 కూడా మొదలుపెట్టేశాడు. ఇందులో సిద్ధూ సరసన అనుపమ పరమేశ్వరన్ హీరోయిన్ గా నటిస్తుంది. ఈ సినిమాను ఆగస్ట్ 11న విడుదల చేసేందుకు మేకర్స్ ప్లాన్ చేస్తున్నారు. అయితే అదే రోజు మెగాస్టార్ భోళా శంకర్ కూడా విడుదలకు సిద్ధంగా ఉంది
కంటెంట్ పైనే సిద్ధూ నమ్మకం
వాల్తేరు వీరయ్యతో సూపర్ డూపర్ హిట్ అందుకుని ఫామ్ లోకి వచ్చేశారు మెగాస్టార్. ఇప్పుడు మెహర రమేశ్ దర్శకత్వంలో భోళా శంకర్ చేస్తున్నారు. మెగాస్టార్, కీర్తి సురేశ్ ఉన్నారని తప్ప సినిమాపై ఆడియన్స్ లో హైప్ క్రియట్ అవ్వడానికి ఒక్కటంటే ఒక్క ఎలిమెంట్ కూడా లేదు. దీనికితోడు ఇది తమిళ్ హీరో అజిత్ వేదాళం సినిమాకు రీమేక్. ఆల్ రెడీ మన తెలుగు ప్రేక్షకులు వేదాళం చూసేయడంతో.. మూవీపై తెలుగు ప్రేక్షకులకు పెద్దగా అంచనాలు లేవు. దీనికితోడు దాదాపు పదేళ్ల గ్యాప్ తర్వాత మెహర్ రమేశ్ చేస్తున్న సినిమా ఇది. దీంతో… భోళా శంకర్ ఎప్పుడు రిలీజ్ అవుతుందా అని ఆడియన్స్ వెయిట్ చేసే పరిస్థితి అయితే లేదు. కానీ ఇదే సమయంలో డీజే టిల్లూపై బీభత్సమైన హైప్ ఉంది. బీసీ సెంటర్స్ తో పాటు ఏ సెంటర్స్ లోనూ డీజే టిల్లూకి ఫ్యాన్స్ ఉన్నారు. దీనికి తోడు సినిమా కంటెంట్ పై సిద్ధూకి నమ్మకం ఉంది. అందుకే మెగాస్టార్ సినిమాపై తన సినిమాను విడుదల చేస్తున్నాడు సిద్ధు.
యువత, మల్టీప్లెక్స్ లే టార్గెట్
మెగాస్టార్ చిరంజీవి సినిమాలకు బీసీ సెంటర్లలో తిరుగుండదు. సినిమా సూపర్ హిట్ అయ్యిందని టాక్ వస్తే మల్టీప్లెక్సుల్లో కూడా డీసెంట్ వసూళ్లు వస్తాయి. అందులోనూ బోళా శంకర్ చెల్లెలు సెంటిమెంట్ తో వస్తున్న సినిమా కావడంలో ఫ్యామిలీ ఆడియన్స్ ఆదరిస్తేనే హిట్. కానీ డీజే టిల్లూకి ఆ ఇబ్బంది లేదు. ఈ సినిమాకు యూత్ అండదండలు పుష్కలంగా ఉన్నాయి. సినిమా టాక్ ఎలా ఉన్నా కూడా ఓపెనింగ్స్ కు ఢోకా ఉండదు. హిట్ టాక్ వస్తే టిల్లూకి తిరుగు ఉండదు. ఒకవేళ రెండు సినిమాలకు హిట్ టాక్ వచ్చినా ఫ్యామిలీ ఆడియన్స్, యూత్ కూడా డీజే టిల్లూకి వస్తారు. అందులోనూ యూత్ రిపీట్ ఆడియన్స్ జోన్ లోకి వస్తారు. కాబట్టి టిల్లూ కలెక్షన్లకు ఎలాంటి ఢోగా ఉండదు. ఇన్ని లెక్కలేసుకున్నాడు కాబట్టే ధైర్యంగా మెగాస్టార్ పై తన సినిమాను రిలీజ్ చేస్తున్నాడు సిద్ధూ జొన్నలగడ్డ.