బాహుబలి సినిమాతో ప్రభాస్ పాన్ ఇండియా స్టార్ గా మారిపోయాడు. టాలీవుడ్ , బాలీవుడ్ ఎక్కడైనా ప్రభాస్ క్రేజ్ మామూలుగా లేదు. అయితే బాహుబలి తర్వాత మాత్రం ఇప్పటి వరకూ మాత్రం ఆ రేంజ్ హిట్టందుకోలేదనే చెప్పాలి. సాహో ఓహో అనిపించినా, రాధేశ్యామ్ ఫ్యాన్స్ ని నిరాశపర్చింది. ఇప్పుడు ఆదిపురుష్ గా రాబోతున్నాడు. ఈ సినిమాకు సంబంధించి ఇప్పటికే విడుదలైన టీజర్ విమర్శలు ఎదుర్కొంది. చిన్న పిల్లల యానిమేషన్ మూవీలా ఉందని రామాయణం ఫీలింగ్ రాలేదని, రాముడికి మీసాలేంటి, రాముడి రంగేంటని చాలా విమర్శలు ఎదుర్కొంది. ఇకపై అలాంటి విమర్శలు రాకూడదంటే మరిన్ని జాగ్రత్తలు తీసుకోకతప్పదని ఫిక్సయ్యారు. అందుగు తగ్గట్టే..అంచనాలు భారీగా పెంచేలా పోస్టర్ విడుదలచేశారు. అక్షయ తృతీయ సందర్భంగా విడుదల చేసిన ఆదిపురుష్ పోస్టర్ లో.. విల్లు చేతబట్టిన శ్రీరాముని రూపాన్ని చూపించారు.
అక్షయ తృతీయ సందర్భంగా విడుదల చేసిన పోస్టర్ చూసి ఫ్యాన్స్ ఫిదా అయ్యారు. ఇప్పటి వరకూ వచ్చిన విమర్శలకు ఈ పోస్టర్ చెక్ పెట్టేసిందని సంబరపడుతున్నారు. ఈ కొత్త పోస్టర్ లో ప్రభాస్ చేతిలో విల్లు పట్టుకొని ఉన్నాడు. ఆ విల్లుకు నిప్పు అంటించిన బాణం కూడా ఉంది. రావణుడితో యుద్ధం చేసే సమయంలో పదితలల రాక్షసుడిపై బాణం ఎక్కు పెట్టినట్లుగా ఆ పోస్టర్ లో ప్రభాస్ కనపడుతున్నాడు. ఆ పోస్టర్ ఇప్పుడు ఫ్యాన్స్ కి విపరీతంగా నచ్చేసింది.
‘జైశ్రీరాం’ సాంగ్ మోషన్ పోస్టర్
‘ఆదిపురుష్’ సినిమా కోసం సంగీత దర్శకులు అజయ్ – అతుల్ స్వరపరిచిన ‘జైశ్రీరాం’ సాంగ్ మోషన్ పోస్టర్ ను కూడా ఈ రోజు ఆవిష్కరించారు. తెలుగు, హిందీ, తమిళం, మలయాళం, కన్నడ… మొత్తం ఐదు భాషల్లో పాటను విడుదల చేశారు. త్వరలో పూర్తి పాట విడుదల కానుంది.
”నీ సాయం…సదా మేమున్నాం
సిద్ధం…సర్వ సైన్యం!
సహచరులై…పదా వస్తున్నాం!
సఫలం…స్వామి కార్యం!
మా బలం ఏదంటే…నీపై నమ్మకమే!
తలపున నువ్వుంటే…సకలం మంగళమే!
మహిమాన్విత మంత్రం నీ నామం
జైశ్రీరాం జైశ్రీరాం జైశ్రీరాం రాజారాం!”
అంటూ సాగిన ఈ గీతాన్ని సరస్వతీపుత్ర రామ జోగయ్య శాస్త్రి రాయగా…సుమారు 20 మంది ఈ పాటకు కోరస్ అందించారు.
జూన్ 16న ప్రపంచవ్యాప్తంగా విడుదల
ఈ ఏడాది జూన్ 7 నుంచి 18వ తేదీ వరకు ట్రిబెకా చలన చిత్రోత్సవాలను ఘనంగా నిర్వహించనున్నారు. అందులో ప్రదర్శనకు ‘ఆదిపురుష్’ సినిమా ఎంపిక అయ్యింది.జూన్ 13వ తేదీన ‘ఆదిపురుష్’ ప్రీమియర్ షోకి ఏర్పాట్లు చేశారు. దర్శకుడు ఓం రౌత్ ఈ విషయాన్ని ట్వీట్ చేశారు. ఇక జూన్
జూన్ 16న ప్రపంచవ్యాప్తంగా ‘ఆదిపురుష్’ విడుదల కానుంది. తెలుగుతో పాటు హిందీ, తమిళ, కన్నడ, మలయాళ భాషల్లో భారీ ఎత్తున చిత్రాన్ని విడుదల చేయనున్నారు. టీ సిరీస్ అధినేత భూషణ్ కుమార్ అండ్ కృష్ణన్ కుమార్, దర్శకుడు ఓం రౌత్, ప్రసాద్ సుతార్, రెట్రోఫిల్స్ రాజేష్ నాయర్ (Rajesh Nair)తో కలిసి ప్రభాస్ హోమ్ బ్యానర్ లాంటి యూవీ క్రియేషన్స్ ఈ సినిమాను విడుదల చేస్తోంది. ప్రభాస్ రాముడిగా నటిస్తోన్న ఈ సినిమాలో కృతి సనన్ సీతగా, లక్ష్మణుడి పాత్రలో సన్నీ సింగ్ నటించారు. ఓం రౌత్ (Om Raut) దర్శకత్వంలో తెరకెక్కుతోంది ఈ సినిమా. భారీ అంచనాల మధ్య విడుదలవుతోన్న ఆదిపురుష్..బాహుబలిని మించి అనిపిస్తుందో లేదో వెయిట్ అండ్ సీ…
