Jd Lakshminarayana తన రాజకీయ భవిష్యత్‌పై ఆసక్తికర వ్యాఖ్యలు చేశారు. వచ్చే ఎన్నికల్లో కచ్చితంగా పోటీ చేస్తానని కుండబద్దలు కొట్టేశారు. వచ్చే ఎన్నికల్లో కచ్చితంగా పోటీ చేస్తానంటున్నారు సీబీఐ మాజీ జేడీ లక్ష్మీనారాయణ. పార్టీల నుంచి ఆహ్వానాలు వస్తున్నాయని.. తాను మాత్రం ఆలోచన చేస్తున్నానన్నారు. లక్ష్మీనారాయణ ఓ న్యూస్ ఛానల్‌కు ఇచ్చిన ఇంటర్వ్యూలో ఆసక్తికర విషయాలు చెప్పారు. పార్టీల్లోకి రావాలని నేతలు తనను కలుస్తుంటారు.. అడుగుతుంటారన్నారు. ఈ క్రమంలోనే బీఆర్ఎస్ పార్టీ నుంచి ఆహ్వానం వచ్చిందన్నారు.. తోట చంద్రశేఖర్ రమ్మని ఆహ్వానించిన మాట వాస్తవమేనన్నారు. చంద్రశేఖర్ తాను ఒకే కేడర్.. మహారాష్ట్రలో కలిసి పనిచేశామన్నారు. ఇద్దరం మంచి మిత్రులమని.. గతంలోనే జనసేన పార్టీలో కూడా ఉన్నామన్నారు. ఆయన ఏపీ బీఆర్ఎస్ అధ్యక్షుడిగా ఉన్నారని.. పార్టీలోకి రమ్మని తనను అడుగుతుంటారన్నారు. తాను మాత్రం ఆలోచిస్తున్నానని ఆయనతో చెప్పానన్నారు. ఇటు వైఎస్సార్‌సీపీ నుంచి కూడా ఆహ్వానం వచ్చిందన్నారు. కొందరు కలిసినప్పుడు అడుగుతుంటారని.. పార్టీలోకి రమ్మంటుంటారని.. వైఎస్సార్‌సీపీ నుంచి 2019లో కూడా రమ్మన్నారన్నారు.
ఐఏఎస్‌ నుంచి వీఆర్ఎస్ తీసుకోవడానికి కారణాలను కూడా లక్ష్మీనారాయణ వివరించారు. తాను హైదరాబాద్‌లో ఎన్‌ఐఆర్‌డీ సంస్థలో డిప్యూటీ డైరెక్టర్‌ జనరల్‌ పదవి కోసం ప్రయత్నించానని.. దరఖాస్తు చేశాను అన్నారు. ఒకవేళ అది వచ్చి ఉంటే రాజకీయాల్లోకి వచ్చేవాడిని కాదన్నారు. ఆ ఉద్యోగం రాకపోవడంతోనే.. రాజకీయాల్లోకి రావాలని నిర్ణయించుకున్నట్లు చెప్పారు. అలాగే తాను ప్రస్తుతం పొలాన్ని కౌలుకు తీసుకుని వ్యవసాయం చేస్తున్నాను అన్నారు.. రైతులను ఆర్గానిక్‌ వ్యవసాయం వైపు మళ్లించే ప్రయత్నం చేస్తున్నాను అన్నారు.
తాను 2019 ఎన్నికల్లో పోటీచేసి దాదాపు 2,88,754 ఓట్లు సాధించానని గుర్తు చేశారు లక్ష్మీనారాయణ. కాబట్టి తాను గెలిచాననే అనుకుంటున్నానని.. మరి వాళ్లంతా మార్పు కోరుకుంటున్నారనేది పాజిటివ్‌ కదా అన్నారు. ఓడినా ఎలాంటి బాధ లేదని.. ఇప్పుటు విశాఖ స్టీల్ ప్లాంట్ కోసం హైకోర్టులో పోరాటం చేస్తున్నాను అన్నారు. ప్రత్యేక హోదా కూడా ఇప్పటికీ సాధ్యమేనని.. దీనిపై పోరాడాలి అన్నారు. కచ్చితంగా ఎన్నికల్లో సంస్కరణలు రావాలన్నారు. గతంలో తాను ప్రస్తావించిన అంశాలను గుర్తు చేశారు.
వచ్చే ఎన్నికల్లో కచ్చితంగా పోటీ చేస్తానని.. తనకు గ్రామీణాభివృద్ధితో పాటూ వ్యవసాయంపై కొన్ని ఆలోచనలు ఉన్నాయన్నారు. ఈ అంశాలపై చర్చిస్తామని హామీ ఇస్తే పార్టీల్లో చేరతానని చెప్పుకొచ్చారు. సాధారణంగా మేనిఫెస్టోలు పెడితే ఇండిపెండెంట్‌గా పోటీ చేస్తానంటున్నారు. ఒకవేళ రాజకీయాల్లో ప్రజలు ఆదరించకపోతే కంటిన్యూ అవుతానని చెప్పారు. ఢిల్లీ లిక్కర్ స్కామ్‌లో ఎమ్మెల్సీ కవిత వ్యవహారంపైనా స్పందించారు. ఫైనల్‌గా కోర్టుకు చేరుతున్నాయని.. సుప్రీం కోర్టు గైడ్‌లైన్స్‌ను బట్టి.. ప్రజా ప్రతినిధులపై కేసులు ఏడాదిలోపు పరిష్కరించాలని ఉందన్నారు. కానీ అది జరగదన్నారు.
