కన్నుల బాసలు తెలియవులే కన్నెల మనసులు ఎరుగవులే ఒకవైపు చూపి మరువైపు దాచగ అద్దాల మనసు కాదులే… అప్పట్లో యూత్ ని ఓ ఊపు ఊపిన ఈ సాంగ్ గుర్తుందా… ‘7/G:బృందావన్ కాలనీ’… ఇప్పుడీ సినిమాకు సీక్వెల్ సిద్ధమవుతోంది
చాలా సినిమాలు వస్తుంటాయి..పోతుంటాయి..కానీ కొన్ని సినిమాలు మాత్రమే ట్రెండ్ సెట్ చేస్తాయి. అలా ట్రెండ్ సెట్ చేసిన మూవీస్ లో 7/G బృందావన కాలనీ ఒకటి. సెల్వరాఘవన్ దర్శకత్వం వహించిన ఈ సినిమా 2004లో తమిళంలో ‘7/G రెయిన్‌బో కాలనీ’ గా తెలుగులో 7/G బృందావన్ కాలనీగా విడుదలైంది. రొమాంటిక్‌ డ్రామా బ్యాక్ డ్రాప్ లో తెరకెక్కిన ఈ మూవీలో రవి కృష్ణ, సోనియా అగర్వాల్ హీరోహీరోయిన్లు. చంద్రమోహన్‌, విజయన్‌, సుమన్‌ శెట్టి, సుధ, మనోరమ ఇతర కీలక పాత్రల్లో నటించారు.
మరో అర్జున్ రెడ్డి అవుతుందా..
తెలుగు, తమిళ భాషల్లో విడుదలైన బాక్సాఫీస్‌ను షేక్ చేసింది ఈ సినిమా. రవి కృష్ణ , సోనియా అగర్వాల్ కెరీర్లో ల్యాండ్ మార్క్‌ సినిమాగా నిలిచిపోయింది. ఈ ఆల్‌టైమ్‌ సూపర్ హిట్‌ సినిమాకు సీక్వెల్‌ను తెరకెక్కించనున్నట్టు నిర్మాత ఏఎం రత్నం ఇప్పటికే క్లారిటీ ఇచ్చేశారు. అయితే ఇప్పుడు ఈ క్రేజీ సినిమా సీక్వెల్ న్యూస్ ఏంటంటే..సీక్వెల్ ప్రాజెక్ట్ జులైలో సెట్స్‌పైకి వెళ్లనుందట. సీక్వెల్లో కూడా రవికృష్ణ హీరోగా నటిస్తున్నాడు. 7/G బృందావన్ కాలనీ సీక్వెల్లో విజయ్ దేవరకొండ పేరు కూడా తెరపైకి వచ్చింది. జూలైలో షూటింగ్ ప్రారంభమవుతుందని అంటున్నారు. కానీ ఇప్పటివరకు సినిమా సీక్వెల్ పై మేకర్స్, నిర్మాత లేదా నటులు ఎవరూ దీనిపై క్లారిటీ ఇవ్వలేదు. ఒకవేళ ఆ వార్తే నిజమైతే మరో అర్జున్ రెడ్డి అవడం పక్కా అంటున్నారు ఫ్యాన్స్.
హీరోయిన్ ఎవరు..
ఈ సినిమాలోని చాలా సన్నివేశాలు అత్యంత సహజంగా తెరకెక్కించడంతో యూత్ కు బాగా కనెక్టైంది. యువన్‌శంకర్‌ రాజా అందించిన స్వరాలు మెస్మరైజ్ చేశాయి. ఆ తర్వాత రవికృష్ణ, సోనియా అగర్వాల్ లు కొన్ని సినిమాల్లో నటించినా అవి ప్రేక్షకులను అంతగా ఆకట్టుకోలేకపోయాయి. ఆ తర్వాత సోనియా అప్పుడప్పుడు తళుక్కుమంది. 7/G బృందావన్ కాలనీతో టాలీవుడ్‌కు పరిచయమైన సోనియా అగర్వాల్.. ఆ సినిమాలో నటిస్తున్నప్పుడే దర్శకుడు సెల్వ రాఘవన్ తో ప్రేమలో పడి 2006లో పెళ్లి చేసుకుంది. మనస్పర్థల కారణంగా వారిద్దరూ 2010లో విడాకులు తీసుకున్నారు. ఆ తర్వాత తాను చాలా మానసిక క్షోభకు గురయ్యానని, ఆ సమయంలోనే తన జీవితంలోకి గీతాంజలి వచ్చిందని, ఆమె వల్ల నా జీవితంలో పెను మార్పు చోటుచేసుకుందని, ఇప్పుడు ఇద్దరం సంతోషంగా ఉన్నామని ఈ మధ్యే సెల్వ రాఘవన్ చెప్పారు.సెల్వరాఘవన్ మరోసారి దర్శకత్వం వహించనున్న ఈ సినిమాలో హీరోయిన్ సహా నటీ నటులు ఎవరన్నది ఏఎం రత్నం టీం త్వరలోనే క్లారిటీ ఇవ్వనున్నట్టు తెలుస్తోంది.
